點評百元保險股
2019年05月03日
美國聯邦儲備局開完兩日會，維持利率不變。本來市場睇央行會否考慮減息，結果出來的公佈並無流露呢個訊息，聯儲局主席鮑威爾形容現時低通脹屬「暫時性質」(transitory)，不會持續。若通脹回升又點減息呢？結果杜指隔晚收市回落162點。
近日美國公佈的數據不俗，加上美股表現堅挺，這個時候若說聯儲局會減息，都有點誇張，議息聲明可以話係相當正常，美股回落有點順勢調整。
以美國今年以來表現來看，增長維持不錯勢頭，加上通脹持續在低位，整體基調其實幾好，聯儲局固然暫時看不到加息需要，對總統特朗普而言，爭取連任子彈亦增加。
友邦領展創近年新高
特朗普上台後不斷催谷經濟，至今經濟景氣仲可以保持，現時仲留有儲局減息的幾發子彈，若然有咩閃失，可以用來救急。
通常經濟向好，總統連任機會好大，民主黨年頭搞政府停擺搞唔死佢，只要局面持續多一年，特朗普競選就大有優勢，正因如此，雖然民主黨好多人出來爭做候選人，共和黨就無人敢出來同特朗普叫陣。
美國唔減息好正路，雖然美股回調，但港股未受影響，假後開市恒指輕微低開，但好快已經轉跌為升，並藉中美有望下周五宣佈達成貿協，加上內地金融市場進一步開放，推動港股「五窮月」首個交易日造好。
恒指升245點，收報29944點，再次向三萬點關口進發。內地繼續休市，喺北水暫停下，大市成交金額縮減至715億元。
港股回升動力之一，係來自友邦(1299) 和領展(823) ，兩者接連破頂，友邦創三年新高，中銀保監稱近期擬推出12條對外開放新措施，市場憧憬友邦將受惠，另一隻受惠大股係平保(2318) 。
友邦同平保，係陸羽仁近年較為喜愛股份。幾年前陸羽仁同友邦高層飲茶，當時我笑言此股有機會成為紅底股。
友邦高層賣保險做生意一流，但對股市投資則較少留意，以當時股價50元計，佢反而覺得呢個目標似乎太高。但如今回看，友邦愈升愈有，友邦昨日收報83.25元，升4%，離紅底目標又近一步。
雖然睇好友邦前景，但該股市盈率有成40倍，要去到百元目標，市盈率會飆升到50倍，感覺上有點高。
另一個情況係將來公佈盈利有增長，令市盈率回落，咁樣數字上就會較易接受。如果按照呢個推論，除非大市爆升，否則股價需要時間培養，唔易一口氣急升。假設未來大市有望上到三萬點樓上，假以時日友邦嘅百元大股目標就有機會達成。
平保有價值窪地優勢
另一隻有機會成為紅底股的保險股平保(2318) ，昨日繼續造好，收報95.45元，升1%。平保屬下的平安好醫生(1833) 喺網上俾人唱衰，股價跌1.3%，但昨日阿媽平保股價仍然能隨市升1%，反映平保個底都幾強。
平保現時市盈率14倍，息率有兩厘。不利之處係公司有A股上市，有時會吸走追捧資金，優點係同其他保險股比屬於「價值窪地」，略為偏低，所以做百元大股條件唔弱。
陸羽仁
金融High Tea - 陸羽仁 舊文
來源 source: http://hdfin.stheadline.com
