【大茶飯】見底指標要睇實（青冰）
五窮月已過去，六月究竟絕不絕，暫時來看個氣氛都係曳，如果要為五月選一個風雲人物，相信侵侵應該力壓秋官當選，貿易戰在頭4個月都叫做緩和了，但5月初侵侵的幾個tweet，將全球氣氛扭轉，恆指在4月底時係升14.9%，上星期五埋單已經得返4%，即係話一個月冇咗一
成，而上證及滬深指數，在五月分別只係跌6%及7%，換言之港股又擔當了提款機的角色。
政治市一向難玩難估，青冰都答你唔到究竟跌完未，不過即管用過去一年的一些數據，睇嚇搵唔搵到啟示。前輩教落，最差的股份最後先炒，最強的股份最後先隊，咦，咁後者似乎在上星期出現了，是見底訊號嗎？自從2017年隻慢牛死咗，這段日子以來，最強最穩的，非幾隻公用股中電(0002)、煤氣(0003)及領展(0823)莫屬，股息穩步增長，在動盪市必成資金避難所，由於整個市場都抱著同樣信念，股價跌少升多，估值也漸偏離合理價，但即使你嫌佢貴，大戶散戶都唔敢去沽囉。
睇返去年的走勢，恆指由33484點見頂，一直跌至十月才見底，貿易戰自四月開波，之後一浸一浸咁沽落，而跌得最狠的是十月，單月跌一成。青冰計過，以上3隻最強的公用股，跌幅最明顯時皆在9月底至10月初，領展10月2日至8日跌9.7%，中電從9月20日起反覆跌至10月5日，累跌8.5%，而煤氣亦跟住中電，同時段跌了5.6%。有睇開佢咃的戰友都知道，要短時間內跌一成，較罕見，這個跌幅已差不多等同股災架喇。
但恆指真正的底位係在10月尾出現，而3隻股跌得最急時卻在月初，換言之如果戰友見最強的股份都狂隊，因而入市，相信都要挨多幾星期價，最後守唔守得住，就考你持貨能力及心理質素了，不過如果唔奢求摸底，這個指標都算合格嘅。
而騰訊(0700)、友邦(1299)及匯控(0005)三隻重磅股份，52周新低都同樣是在去年10月底創出，諗深啲都好正路的，指數跌一成咁恐慌，重磅股自然係重災區，咁沽曬貨啲錢流去邊？如上文所講，就係去返幾隻穩陣股，所以明顯見到當時係較10月初跌得少跌得慢，甚至逆市升。
當然，冇人有水晶球可預知，今次會唔會跟返上一次咁行，只能摸著石頭過河，預測邊月或邊日可以見底，還是留給高手去做吧，我哋老散都係等打完風先出來搵食吧。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com
