撻訂明智
2019年06月13日
昨日佔中重臨，警察仲出動橡膠彈、催淚彈同布袋彈鎮壓，大市急插480點。市場近日最熱話題，係會唔會出現佔領2.0同高銀金融撻訂一事。特首林鄭月娥前日喺社團活動爆咗句「香港風雨飄搖」，跟住就有財團因為「本地政治矛盾」，決定撻訂唔買啟德地王，外
界因而猜測特首係咪一早收到料。
啟德地皮撻訂，買家高銀金融(530) 主席潘蘇通同獨董石禮謙都出嚟解畫，大家口徑係潘蘇通想繼續交易，但董事局其他成員就覺得風險太大，堅持叫公司撻訂。私人企業雖然有董事局，但主席係老闆，大家唔同意見，通常係董事聽老闆話，o依家老闆要聽董事話，中環茶友笑言咁民主嘅公司，真係創出管治新領域。
首要保本懷疑即斬纜
由於石禮謙係立法會議員，佢牽頭反對繼續交易，外界關注係咪同佢嘅政治取態有關。聽聞佢事後私底下同人講，今次係純粹商業決定，皆因現時風大雨大，咁龐大嘅商業項目，根本好難喺市場融資，就算想博都冇條件博，作為獨董有需要履行職責反對。
石禮謙死話撻訂唔涉及自己對《逃犯條例》有保留取向，茶友就直言真正原因唔重要，但以現時環境，撻訂斬纜都係自保方法。高銀111億投到啟德地皮，結果公佈出嚟，市場已經話成交價高過預期。以呢個成交價，若去銀行融資，攞到嘅按揭成數好可能比一般低，由於商業項目風險比住宅大，所以資金要求高，石禮謙話有財政風險，應該唔係作出嚟。
再者，之前高銀曾經將九龍灣項目按畀其他發展商借錢，咁嘅環境，集團資金應該唔會太鬆動，最近本地利率持續上升，幅度雖然唔大，但都唔可以掉以輕心。
今次高銀撻訂，會被沒收2500萬元，但相對過百億元標價，唔夠0.25個百分點，若然撻訂再投，隨時有機會平得仲多。公司喺撻訂後話有可能會被追差價，不過入標嘅係為項目成立嘅有限公司，未簽大約，母公司未做擔保，相信政府成功追差價機會好低，所以條數計落唔係咁蝕底。
茶友話，做地產最重要係持貨能力，根據過去幾次樓市大起大落經驗，無論買得幾貴，只要有力守落去，最後都能贏錢，最重要就係唔好俾人斬倉。要有力持貨，咁就要有一定防守力，如果睇唔清前景，減磅都係明智做法。
睇番股價表現，高銀金融今年股價由3.3元一路碌，碌到去噚日嘅2.31元，反而喺宣佈終止交易後，股價無起跌，而其他本地地產股就受重創，新世界發展(017) 下挫近5%，收報11.64元；新地(016) 跌3%，收報125.1元；恒地(012) 跌2.4%，收報40.5元。大市急插1.7%，高銀算係逆市造好。其實炒股都係一樣，買入後一旦覺得唔對路，首要就係保持資金安全，留得青山在，哪怕冇柴燒，尤其是特首都話o依家好飄搖。
撩高大股果然托沽
睇番大環境，本來《逃犯條例》修例噚日上立法會二讀，結果引發示威者再癱瘓馬路，佔中重臨，金鐘銀行停止營業，下午警方仲施放催淚彈同橡膠子彈。美國國會議長佩洛西話密切留意香港情況，似乎形勢非常緊張，喺咁嘅環境下，港股開市無耐就下插，指數一度跌567點，恒指收報27308點，挫480點；國企指數收報10494點，跌125點，成交金額770億元。黃金相關股票成避險工具，山東黃金(1787) 收升6%，報19.84元；招金礦業(1818) 揚5%，收報7.95元；紫金礦業(2899) 升3%，收報2.87元。
港股上個星期喺美股帶動下，反彈接近1000點，但主要係撩高基建股同低風險大股，托沽味道相當濃，噚日就藉政治環境出事，大力插下來。
陸羽仁
金融High Tea - 陸羽仁 舊文
來源 source: http://hdfin.stheadline.com
