冰說聰明 - 青冰 2019年7月11日
【冰說聰明】新城有難 鋤dee支援 - 青冰
大劉的禦用劵商天發證券上周積極低位吸納新城，會唔會係有心營造一個市場訊息，大劉入市呢？ 資料圖片 適中字型 較大字型
新城（1030）主席王振華上周三爆出被公安拘留，原因係涉嫌猥褻9歲女童，股價即時急插，隨後市場再傳出同個仔不和，又傳得罪咗中央，幾十個版本，雖然老細隨即辭任主席及執董之職，但對股價冇幫助，A股連續四個跌停板，港股亦一度跌逾四成。不過最吸引青冰注視的，是在上周四，有間經紀行積極吸納，就是大劉的禦用劵商天發證券。
當日天發證券不斷在報價機左邊出現，不過買盤只持續一天半，周五下午就收了兵。T+2之後的CCASS數字，顯示周四淨買入4,097萬股，周五淨買入1,875萬股，現時持有1%股本，距離要舉牌的5%還有大段距離。兩年前的5月，大劉亦是主要用天發證券買入恒大（3333），當時股價約8蚊，睇CCASS數字，每當天發證券大手買入後，便會將持貨射走，從不累積到超過1%股本的貨，直至7月中，華置（127）正式發通告，指已持有6.55億股，佔5%股本，那時股價已16蚊了。
大劉同許家印份屬老友，係鋤dee會成員，你有難我出手，撐股價殺淡友，絕對可以理解，但同新城老闆王振華，應該冇太大交情，出手原因成謎。戰友可能會話，或者大劉此舉純屬buy low sell high而已，但細心諗，天發證券的身份，係人都知，加上當天超積極的買盤，似乎有心營造一個市場訊息，大劉入市呀。
講開恒大，將於7月18日舉行董事會會議，商討是否派發2018年度的末期息，換言之，大劉、甘比及華置，手持約8%的股份，又可以袋返十億八億，咁就有更多閒資可以買股票喎。買新城都係用咗四億零箒，綽綽有餘，咁許老闆跟王振華可能真係friend底喇，派息曲線支持新城股價。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com
