智取大市 - 晉佳 2019年7月29日
【智取大市】股市倒逼林鄭拆彈 - 晉佳
721元朗暴力事件翌日，港股跌幅幾乎係亞太區股市之中最甘。 資料圖片 適中字型 較大字型
好老套地，中美貿易戰情好多時俾股市牽住走，舊年12月美股跌市就係經典一役，科技股大跌倒逼美國暫停加息兼暫停向中國出招，於是今年1月至4月，股市直線上升。
《逃犯條例》修訂風波引發嘅呢場社會運動，官媒聲音似乎比2014年佔領運動時低調。國務院港澳事務辦公室將會喺周一開記招，算係中央個半月以嚟最關鍵嘅表態。究竟過去一星期發生咗乜事？有元朗暴力事件，然後港人、國際出現更大反彈聲音；公務員立場分歧浮上水面；光復元朗行街活動，警方清場後再施暴力；執筆時，警方正在呼籲喺西環嘅市民離去……，仲有，內地滬綜指連升4日，美股標普500指數5日升4日，港股逆市下跌，尤其元朗暴力事件翌日，港股跌幅幾乎係亞太區股市之中最甘。以上種種，究竟邊樣先係逼到國務院要出聲？小弟只能講，資本市場係一股間接但非常強大嘅力量。
當政治開始負面影響到股市，逆市下跌，拖慢港股通買同股不同權股份嘅時間表，拖慢埋阿里巴巴喺香港上市進度，全世界投資者，包括南下買落港股嘅大陸投資者，相信會倒逼林鄭拆彈。港股會唔會因為政治危機而爆煲？就算習近平可以唔飲唔食，大陸班高官子弟都要靠股市「開飯」，影響派餅周期事大，相信中央亦不容許事件搞大。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
