異動尋寶 - 魏力 2019年7月31日
【異動尋寶】阿爺貿談的「三不」方針（魏力）
貿戰談判重開，特朗普率先出招，批評大陸之前講好會大量採購美國農產品，結果又「無咗回事」。查實傾咗成年有多，阿爺的方針好明確：不合作、不投降、不反枱。目的有兩個：一、拖拖嚇自己經濟救番起，再出手反制；二、拖拖嚇美國經濟都瓜埋，攬炒之後，就有籌碼去傾個好刁。
前者成功機會好微，若然中南海真係心存饒倖的話，可以坐定定等睇「硬著陸」。至於後者，相對較大機會，但以目前底子來講，假如連美帝都捱唔住，大陸又會好得去邊？用番習大大句說話，「未來準備迎接驚濤駭浪！」中港股市再迎春天？別想多了。
本港時間週四淩晨，美聯儲減息四分一厘，幾無懸念，重點係之後份議息聲明及記者會，鮑威爾會幾配合「侵侵」去放鴿？回帶去番上次鮑老去國會作證，佢老人家做決定時，都好睇外圍經濟情況。家陣歐洲唔掂，英國又疑似行「硬脫」，亞洲（中日韓）繼續疲弱，美國又無通脹威脅，開哂綠燈繼續減息，故魏力傾向相信，鮑老個取態會幾鴿，起碼幫手壓一壓個美匯，到時港股可以略為靠穩。
開完會、減完息，如無意外，市場焦點會轉去睇業績，騰訊（700）係重中之重。騰訊幾瓣業務，今次焦點必然在手遊，增長引擎能否重新啟動，都係睇佢。大行幾乎一致預期，第二季騰訊遊戲業務可按年反彈2成以上，因此近日亦逐步反映在股價之上。如業績（8月14日）前已炒到380蚊樓上，預測市盈率將升至36倍，以今年僅1成的盈利增長評估，已屬昂貴，宜沽不宜買。
筆者為證監會持牌人，未持有上述股份財務權益。
www.facebook.com/2012jason
異動尋寶 - 魏力 舊文
來源 source: http://hk.finance.yahoo.com
