大棋局 - Mr. Tregunter 2019年7月9日
【大棋局】香港局勢 十月戒慎 - Mr. Tregunter
香港局勢紛擾，大鱷如果要搞香港，恐怕最有機會在10月前後出手。
資料圖片 適中字型 較大字型
7月7日23萬人遊行反惡法，已經係香港一個月內第四次大型示威。百萬人上街，大型遊行頻生，讓人聯想起一段往事。1989年中國發生六四事件後三個月，9月4日星期一，東德萊比錫居民塞爆馬克思廣場。由當日開始，東德人民每個星期一出嚟遊行示威一次，並且人數越滾越多，柏林圍牆終於在群眾壓力下，11月9日倒塌。
東德全名德意志民主共和國，卻和民主沒半點關係。所以當時的周一遊行，口號非常簡單又極之有力，就係「我們是人民！」《逃犯條例》點解引起咁大反應，因為人民意識到自由民主逐漸被收緊。美國總統甘迺迪曾經喺柏林圍牆前發表演說：「自由有許多困難，民主亦非完美，然而我們從未建造一堵牆把人民關在裏面。」中國冇柏林圍牆，但有更嚴苛的意識封鎖。《逃犯條例》象徵這堵意識圍牆要擴展到香港，往後你不能不政治正確，這就是為臨界點。
從當權者角度，林鄭現下不能下台，你搞咁大壇嘢出嚟，唔該你自己執手尾。然而，事件一旦平息，林鄭再坐喺度都冇意思。可以預期現時政府內部已冇人聽佢支笛，最多也係陽奉陰違hea住先。
恐大鱷出手搵食
中國官場用人看能力之餘，更重要係看能力是否配合時勢需要。一國兩制五十年不變承諾處於中途轉折位，意味現階段特首人選需要有能力配合承轉。劉邦入咸陽後雖約法三章，其實大抵承襲秦朝法律；豐臣秀吉接掌織田信長領地後，將臣民最難頂部分稍作修改，亦沿用織田武家制度。在當權者角度，最正就係有人將最難做嘅事先做好才接。無論梁振英定林鄭，其實都只係負責頂最惡啃部份，真命天子在後面。
金管局總裁陳德霖10月卸任；林鄭無論現下是否下台，政府內部凝聚力已散，需要時間重整；人民對林鄭搞出禍後龜縮不承擔反感，民情未見有消退意；政府神隱，其實大機會在部署如何平息事件，然而會否又亂嚟？在此四種形勢下，大鱷如果要搞香港，最有機會在10月前後出手。加上貿易戰最後協議短期內未搞掂，Kyle Bass早前揚言要沽空港元，其動態係放風吹雞，令事情醞釀，等待狙擊臨界點。投資者宜戒慎。
牟宗三先生有句話，叫遮顯。林鄭原本嘅作用是來鋪路，但她為香港鋪出一條荊棘之道。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com
