魚樂無窮 - 唐牛 2019年8月15日
【魚樂無窮】唔完美淡倉策略 - 唐牛
鬼佬投資香港的基金有拆倉象，可以預期，港股彈散格局難以改變。 資料圖片 適中字型 較大字型
中美貿易戰再露曙光，帶動恒指昨日高開逾400點，但未有由頭挾到尾之餘，升幅越縮越窄，更一度倒跌，埋單僅升20點。
點解沽壓咁嚴重？一來早上公佈的中國經濟數據遠遜預期，惹來人民幣進一步貶值的憂慮，二來我最擔心的香港困局未解，更有蔓延至國際層面的跡象，與芬佬朋友傾開，佢話見到鬼佬投資香港的基金有拆倉跡象，成為本地概念股捱沽的原因，可以預期，彈散格局難以改變。
「咁現時做淡友贏面好高啦！」如果只睇結果，買put開熊好似sure win，但遇上突發事件，如果擇錯工具，加上心理質素不佳，也可以輸錢收場。
以自己為例，周一手持貼價恒指熊仔（收回價約25900點）過夜，昨早指數高開後，熊仔價格即時唔見一半，只要再挾高多200點，觸及收回機制，就算之後倒跌1,000點，我都冇仇報。所以當時就止唔止蝕的問題，自行腦交戰一段時間，最終採取佛系策略，唔使輸算是好彩。
賽後檢討，一心諗住個市實死無生，卻忽略了侵侵這個最大變數，風險控制應做得更好，唔完美，可接受。怕過夜有風險，最好都係揀遠價少少的熊仔，或者沒有收回風險嘅put啦。
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.finance.appledaily.com
