冰說聰明 - 青冰 2019年8月15日
【冰說聰明】拿國泰祭旗之得益者 - 青冰
國泰的黴運由2014年開始，先是對沖燃油勁蝕，近日則因為反修例抗爭惹禍。
資料圖片 適中字型 較大字型
這幾年本港人禍特別多，但相信在上市公司中，沒有人比國泰（293）的股東對人禍二字感受更深。這間香港人的航空公司，黴運在2014年開始，當燃油價格由過百蚊美元開始急插，跌到落2016年初的26蚊，全世界的航空公司拍爛手掌，因為有平油用嘛，但國泰就在2016年給你驚嚇，對沖燃油勁蝕，拖累公司連續兩個年度見紅，唔知這人禍是由誰造成，但記憶中就冇管理層因此而下台。
好不容易捱到去年，終於可以同股東講，對沖策略的影響終成過去，股價見底回升，今年仲收購香港快運，正想大展拳腳之際，近日又成為了抗爭運動的風眼，周二低見9.27元，是海嘯後的最低價。本身在整個反修例抗爭，國泰都唔算太關事，公司冇表態，亦冇反對員工參與運動，但隨著事件越趨嚴重，更難獨善其身。
早幾日國內民航局向國泰發出重大航空安全警示，要求國泰停止員工支持或參與非法示威活動，母公司太古（019）即刻跪低，主席施銘倫立即負荊請罪，按新聞所見，民航局副局長是應約會見，即係你主動約我先見你咋，仲只派個副局長來應酬。點解一發惡就即跪，除了因為國泰要靠內地航線發圍，另一重點係國航（753）持有29.99%國泰，作為第二大股東一定聲大夾惡啦。可能內地對好多本港大企業頗有微言，唔幫手撐警嘛，但最多都只能夠隔空鬧，所以拿國泰來祭旗，只能說係黴氣未除。
機場停運，國泰跪低，看似沒有得益者，但細心啲睇，深圳兩個上市的機場，白雲機場（600004）及深圳機場（000089）本周急升兼破位，醒目資金是亂炒，還是早有預謀，留畀戰友自己判斷。跪就苟延殘喘，唔跪就益咗內地航空業，難怪太古亦急急出聲明，強力支持香港政府了。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com
