地產股急轉彎
2019年08月16日
美股因為債息倒掛，搞到杜指大跌800點收市，估唔到港股竟然無事。恒指開市一度急插，之後轉跌為升，收報25495點，反升193點；國指收報9903點，漲37點，成交金額966億元。
大股騰訊(700) 手遊收入雖然增多，但難阻急跌2
.8%，收報330.4元，內地電訊股同香港地產股係力撐指數功臣，中國移動(941) 急升5.4%，收報66.1元。
前晚觸發美股大跌主要係債息倒掛，擔心美國衰退重臨，但除咗港股無跌外，內地股市同樣穩陣，上證指數收市微升6點，報2815點；深證指數升43點，報9009點。或者好似我喺網誌中講，美股往往喺債息倒掛後一段時間倒升；又或者市場認為周三港股無跟住美股升，所以昨日都毋須跟跌。仲有一個理由係，美股咁樣爆落去，中美政府都可能出招挺經濟，美國聯儲局下次開會減息機會增加，同時中美喺貿易談判上，會因為經濟轉差變得務實。
大趨勢係經濟差利息降
無論邊個解釋都好，港股今次跌市免疫，投資者毋須高興得太早，因為喺經濟昇平，人人愛玩嘢的年代，上至總統、下至平民百姓，都要發聲搞作，股市短線波動極難預測，今日可以搵好多理由解釋點解個市不跌，明日一樣可能要搵好理由解釋點解個市會跌。
總之，全球大趨勢係經濟下行機會大過上行，利率趨降，投資者適宜按照本身資金狀況，部署適合自己的中線策略。
美股不好，可能促使美國減息，令本來因為本地因素連插多日的香港地產股急彈，好似由高位插下來的新世界(017) 開市插穿9元的一年低位，但跟住彈番上9.8元收市，全日倒升7.8%，高低波幅超過10%，捉得準即日已經可以收割食胡，而且仲相當和味。
當然，能夠看到咁準的操作機會好細，一隻資產咁厚的股份，喺無特別原因下單日市值波幅近百億元，實在不易想像，遑論走位短炒？
新世界近日弱勢，估計係因為集團負債相對較高，而且過去一年主力取得好長線的項目，市場擔心現金回流慢。
這種重資產同長線策略，係新世界的風格，為了支持投資，過去集團曾低價集資，可能是導致股價跌幅超前大市原因。由於美國衰退機會增加，利息向下可能減輕集團財政支出，所以該公司股價彈得特別勁。
長實上步成功要看下步
另一隻後倒升的地產股係長實(1113) ，股價早段同樣插穿50元心理關口，收市倒升3%，報51.7元。長實同新世界相反，負債偏低，減息利好效應無咁強，所以升幅略遜。
一如早前講創新低股份時，歸納不同類型。長實屬於跟跌型，由於負債低所以慢跌後跌，新增考慮因素係本地政治環境未明，集團準備推出的豪宅盤要押後，成為利淡短期因素。過去長實賣樓以快手見稱，今年因為要賣的樓數量不多，加上要推的大盤屬豪宅，所以臨陣打退堂鼓，這就對賣樓收益預期有點影響。
不過，長實真正重要策略不是賣樓而是買地，因為樓賣早賣遲尚易控制，補充儲備的策略可能更考功夫。
集團過去兩、三年成功套現，亦無在高位大舉投地，算是行了成功的上一步，下一步是如何以合理價格補充土地，這點仍待證實。過往長實作風進取，在波動市中進銳退速，是短炒熱門對象。近年集團作風趨向穩健，重組後派息穩增，現價派息有3.6厘，以公司手頭現金應有足夠能力維持，當然也有可能為增土地儲備減少分派，但隨著策略變化，股價不再像昔日波動。
陸羽仁
金融High Tea - 陸羽仁 舊文
來源 source: http://hdfin.stheadline.com
