智取大市 - 晉佳 2019年9月2日
【智取大市】盲撐警察累死新地 - 晉佳
新地因撐警而失民心，7．21前，股價135元左右，個幾月股價跌17%。 資料圖片 適中字型 較大字型
港股周一開市，照計又隨住太子站事件多少受壓。本地概念股跌勢係由7．21過後爆發，睇嚟8．31事件同樣為本地股添壓。以8月中發聲明「支持警方執法維護法治」嘅新地（016）為例，7．21前，股價喺135元左右，個幾月股價跌咗17%。同期發聲明「支持警方」嘅恒地（012），亦跌16%。手執香港零售命脈時代廣場、海港城嘅九倉置業（1997）吳光正更首當其衝，8月一篇千字文，叫示威者見好就收，單方面針對示威者暴力升級，7．21後跌近兩成。當然，至今跌市包括咗8月初貿戰升溫因素，但睇走勢可以肯定跌浪由7．21觸發。
講返8．31，明明直播睇到同大叔「格傘」嘅數名示威者，衣著易辯認，一時三刻不易換裝，人物較易鎖定，警察又何必向明顯不涉事件嘅站內市民噴胡椒水、揮棍亂打兼大肆拘捕40人？對於香港警察又一次大規模出錯，即使有中央endorse，亦肯定累死本地大孖沙。
7．21令唔少不理政治嘅香港市民，對香港警察失去信任，你話九倉嘅中國收入比例84%就話焗舔共，恒地同新地大陸收入比例分別得25%同10%，喺警察累街坊下，股價跌都跌咗去，後兩者仲係咪要繼續盲目「支持警方」？舔共緊要還是身家緊要？好快就知。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com
