智取大市 - 晉佳 2019年10月11日
【智取大市】強勢股點估頂 - 晉佳
李寧似做緊第三個MACD頂背馳，有可能今個月內見頂，然後反覆進入中線調整浪。
資料圖片 適中字型 較大字型
貿易戰以及香港示威活動對於股市嘅影響，已經消化咗一段日子，縱使有長期不明朗因素存在，但呢個世界始終都要轉，中美始終要搵自己嘅增長點，投資者亦始終要搵食。喺遊資多、同時大部份股票質素太爛之際，於是資金由大部份股票流去小部份股票，至少係存在港股市場嘅實際情況。喺香港，本地概念股已經廢掉武功，國企股有幾廢大家心照，仲有一批假數民企股，於是少數增長股跑出，仲要炒到PEG明顯高過1倍，呢類股幾時見頂？值得研究下。
以往要捕捉股市指數見頂，RSI頂背馳係有效訊號。當炒強勢股嘅話，中線見頂時通常出現MACD大幅波動、或者日線圖MACD頂背馳情況，包括2014年部份濠賭科網股、2018年舜宇（2382）等等。如果見到強勢股出現MACD頂背馳，就要小心升勢去到尾聲，及後可能出現較大調整，李寧（2331）目前就似做緊第三個MACD頂背馳，喺冇業績因素可以再大幅推升股價嘅情況，有可能今個月內見頂，然後反覆進入中線調整浪。
至於股價升幅同MACD波幅開始擴大嘅股份，又係美團（3690）。過往MACD波幅開始擴大，直至股價見頂時，股價都有至少五成額外升幅，甚至超過一倍，通常喺一年內完成，值得留意。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com
