銀行股驚有殺價戰
2019年10月11日
中美貿易談判前夕，買大買細消息滿天飛。本地《南華早報》話先前預備會議無料到，正式談判隨時可能一開會就散場。外媒就話談判有進展，可能先斟妥匯率同華為限制，中國又會增加購買美國農產品。
中美貿易談判開大開細都有可能，內地先前潑冷水，但美國總統特朗普面臨彈劾危機
，好需要有利好消息沖喜，所以不能睇得太淡。最重要係股市大戶經常走喺消息之前，他們有心有力，經常可以不按牌理出牌。最近大市喺跌穿26000點後，成交金額就不斷縮減，而且炒住幾隻重磅半新股，造好個氣氛，維穩味道甚濃。喺這個時間若然追沽做淡，要防止一旦談判有進展，隨時觸發夾倉，就算係無協議，大戶若然要頂住，都可以話消息已經係預料之內。簡單來說，若然無心水不如袖手旁觀食花生，如果睇淡想沽，就要考慮個市跌到近期低位，有被夾倉風險。
領展總裁減持插3%
投資者近日睇淡，部份原因同大行言論有關，好似大摩日前發表報告，唱衰本地銀行股，搞到恒生(011) 同東亞(023) 持續尋底，東亞收報17.98元，跌1%；恒生收報158元，跌1.2%。美國有可能減息，不利銀行息差，加上本地社會氣氛欠佳，的確令人難以睇好本地銀行業績。有人仲話大行唱淡銀行股，背後可能係因為虛擬銀行就快殺到埋身，擔心屆時爆發殺價戰。
陸羽仁不久前同本地大銀行家傾偈，講到行業表現。他說，銀行屬於滯後行業，雖然現在本地百業叫苦連天，但銀行上半年生意未受影響。他估計未來呆壞帳將會增多，但因為本來呆壞帳基數好低，就算上升百分比看來好高，實際數字未必好高。當然，最後仲要睇情況會去到幾壞。
大銀行家話，對做貸款生意來說，零售業數目有限，真正影響係地產、出口這些資金密集的生意，所以中美貿易談判比本地社運影響應該仲緊要。若然中美貿易戰惡化，甚至去到金融領域，咁對銀行業衝擊就會好大。照佢所講，銀行股應該屬於中美貿易談判敏感股之一。
銀行股跌得殘的股份莫過於東亞，集團截至六月底止，半年盈利10億元，按年勁減74.95%，每股盈利22仙，中期息派11仙。中期盈利急挫，主要受到內地非一線城市房地產貸款質素惡化影響，而作出25至30億元巨額減值撥備所拖累，東亞去年上半年同期則賺39.92億元。管理層指，上半年仍會錄得淨利潤，又指是次撥備只屬一次性，料下半年不會復現，業務表現將有改善。東亞過去三年高位見34元，一年高位都有30元，昨日跌破18元，跌幅達40%，如果下半年盈利持平，全年市盈率仍然接近15倍，要等明年才有較大改善，所以股價最近都跟隨其他銀行股尋底。
東亞內地業務要撇帳，都影響其他有內地業務的銀行估值。大新銀行(2356) 昨日一度跌穿10元，收報10.04元，同高位15.5元比，大新跌幅無東亞咁大。大新喺內地主要持有重慶銀行，集團作風一向保守，過去已對呢項投資作出減值。現時該股市盈率只有5.6倍，息率4.8厘，數字上好抵買，但落注與否，就視乎對傳統銀行業面對虛擬銀行衝擊的信心有多大。
大市昨日就低開高走，一度下挫160點，至25521點，創9月3日以來新低，其後據報美國擬推出與華匯率協議，並可能暫緩下周加徵關稅消息，同時又傳出快將允許部份美企向華為供應非敏感產品，推動貿易戰相關股，手機設備股表現亮麗。恒指止跌回升126點，高見25809點，最終收報25707點，反彈25點；國指亦上揚49點，收報10218點；成交金額790億元。
領展(823) 行政總裁王國龍周二減持50萬個基金單位，領展股價偏軟，收挫3%，報80.5元，為跌幅最大藍籌股。
陸羽仁
金融High Tea - 陸羽仁 舊文
來源 source: http://hdfin.stheadline.com
