炒家偷雞 官員埋單
2019年10月23日
美國總統特朗普唱好貿易談判進展，港股指數上落唔大，但資金就炒上落。恒指連續第二日向上，收造26786，上揚60點，全日波幅只得145點；國指走勢偏弱，收造10526，下跌16點，成交751億元。
尋寶股有樣可睇
大昌行(1218) 宣佈私有化，中
環茶友想尋找下一隻大昌行，但呢類股票可遇不可求，若然知道就不如自己入貨，何需與人分享？所以尋寶之道可以分享，具體能否買中，始終都係要靠自己做功課兼講心水。茶友分享尋寶之道，首先係要留意公司價值，若然公司無業務、無資產，純屬「乾炒牛河」，咁就毋須考慮。其次，係要股價偏低，偏低唔係小小低，而是大大低，咁樣大股東先有誘因出手，好似大昌行出價平過12年前，公司業務有基礎，咁就提供咗大股東購買嘅誘因。除咗資產、價錢，第三樣就係財務狀況。有啲公司資產不俗，折讓大，但大股東私有化等同落重飛，都要考慮一旦市況逆轉，若然公司負債重，大股東再融資收購，豈不是債上加債，所以若然翻開年報見到公司負債高，基本上毋須考慮。
睇完以上條件，仲有一樣附加因素，就是睇睇管理層同大股東作風，若然大股東蠱蠱惑惑，長年唔派息，公司資產當正係私有財富盤剝，又何來誘因私有化呢？所以長期唔派息，大股東又食又拎嘅公司，都毋須考慮。如果符合呢啲資格，呢類公司屬進可攻、退可守，買嚟投資，就算睇錯都無壞。
有人話，若然有咁好嘅公司，老早俾人發掘啦？事實又唔係咁樣，因為現大市氣氛弱，加上前景唔明朗，仲有近年股市資訊唔流通，令到好多二三線公司估值低迷。好似大昌行本身都唔係一間細公司，但報道公司消息嘅新聞有幾多？估值偏低，流通量低，投資者入市興趣低迷，係市場新常態，當中有好多政策因素，一言難盡，簡單講，現在二手市場股價低殘，基本上集資功能好弱，所以好多公司老闆都大歎無癮，只係差在會唔會拎錢出嚟私有化。
瑞聲急漲5.8%
講完尋寶之道，投資者可以自己慢慢研究。除咗有發掘價值嘅個股，大市都借住消息炒炒短線。美國蘋果股價創新高，瑞聲科技(2018) 急漲5.8%，收報48.7元，升幅藍籌股中居首。財政司司長陳茂波公佈新紓困措施，有傳會資助港人買機票，推動國泰(293) 曾抽高4%見10.34元，最後升幅收窄，收漲1.8%報10.08元。同時，市傳為吸引旅客來港，政府計劃資助入住酒店每人每晚100元，酒店股齊升，其中香格里拉(069) 表現標青，一度高見8元，終收彈4.4%報7.86元。收市後，政府公佈嘅措施竟然未有相關安排，即市場憧憬相關消息落空，空歡喜一場。中國人有句話，聖人不死，大盜不止，政府想做好人，炒家於是偷雞引人落疊，跟住官員就捱罵埋單。
另一個中招例子係華潤置地(1109) 折讓7%配股，周二股價收插7.88%報33.3元，為包尾恒指成份股，潤地偏軟亦連累一眾內房股出現沽壓，最近股價升得多嘅龍湖(960) 急挫4.4%收報31.45元；當代置業(1107) 挫3.6%收報1.09元。摩通發表報告，對華潤置地(1109) 配售感到有啲意外，又認為潤地目前負債比率唔係特別高，近期也未有作大型土地收購，相信配股集資並非用作特別項目發展，而是為咗響應當局近期鼓勵國有企業提高股權，同去槓桿化嘅方針。由於今次配股攤薄唔大，維持潤地「增持」評級，但目標價降至43.5元。
近日新股興炒首掛，喺東南亞開設台式食店嘅快餐帝國(1843) 今日主板掛牌，上市前夕股價喺暗盤市場走高，收報1.2元，較招股價0.65元高85%。
陸羽仁
金融High Tea - 陸羽仁 舊文
來源 source: http://hdfin.stheadline.com
