金手指 - 孫柏文 2019年11月12日
【金手指】重申：搵夠好走 - 孫柏文
香港作為中國一部份，冇理由不斷維持比大陸其他地方嘅人均富庶程度。遲早要回歸均值。
資料圖片 適中字型 較大字型
A borrowed place on borrowed time，香港確實係人類歷史中其中一個最美麗嘅意外。從或然率角度，香港作為中國嘅一部份，其實係冇理由能不斷維持比大陸其他地方嘅人均富庶程度。遲早都要回歸均值。
日日念經般講嘅「第二大經濟體」，係用「境內生產總值」domestic product去計。而用咁嘅計法，香港及大陸嘅差距係不斷縮細。不過呢種計法，其實有如只睇兩個人嘅糧單出幾多糧。如果有一邊倫敦有層樓收緊租，買咗美國上市嘅股票，啲租金收入同股息用「境內生產總值」係冇計入。要用「國民收入」national income先會見到。
我最擔心嘅地方，係用「人均國民收入」嘅計法，香港不但係大陸嘅好多倍，仲要增幅百分比，快過大陸，即我哋越拋越遠。
用電腦術語，大陸用開嘅操作系統OS，效率已見頂。當然，由1978年起，大陸因要維持政治控制權，要交出經濟增長，多次剷走用開嘅OS，重新安裝。不過今轉因全面監控科技嘅出現，上面對呢種科技嘅信心，可能係1978年來，擺脫要「要經濟交貨去維政權」嘅情況。
喺咁嘅玩法下，我哋香港回歸均值，真係有排跌落去。所以我都係重申幾年前已講過好多次嘅說話，搵夠好走。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.entertainment.appledaily.com
