智取大市 - 晉佳 2019年11月1日
【智取大市】落後醫藥股起動 - 晉佳
麗珠醫藥過往一年冇乜升幅，但似造圓底，8月中至今成交增加，升勢料會加快。 互聯網圖片 適中字型 較大字型
早喺今個星期一，港股通南下買美團（3690）嘅首日，迎來大批獲利盤沽貨，單日大成交兼收市價低於平均價，升勢都要唞唞。喺美團唞氣之際，舜宇（2382）藉5G同蘋果業績勝預期消息而大炒，單日急升7%。兩隻股係科技股嘅兩股唔同勢力，多數輪流炒。焦點一下子去到手機設備股，一批龍尾股仲未見蠢蠢欲動，例如信利（732）、高偉電子（1415）等等。不過，炒作5G概念嘅話，要小心大陸5G套餐價錢貴，恐怕首階段反應未必十分理想。
醫藥股近期表現不差，中生製藥（1177）似準備再破頂，預測2019年市盈率近40倍，如果去到舊年6月預測市盈率高位嘅45倍，面前可能仍有逾一成升幅。至於錦欣生殖（1951）又再發力，破旗之後都係估唔到頂。
論落後醫藥股，麗珠醫藥（1513）過往一年冇乜升幅，但似造圓底，8月中至今成交增加，升勢會加快。第三季業績，扣除非經常性損益後嘅每股盈利32分，預測市盈率唔超過20倍。首三季化學製劑產品、消化道產品、促性激素產品收入分別增長17%、44%及15%，抵銷冇增長嘅原料藥、中藥製劑產品，未來增長板塊比重提高，會有利盈利增長加快，情況似之前石藥（1093），估計股價升勢亦會加速。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com
