金手指 - 孫柏文 2019年12月10日
【金手指】鄭若驊變節失敗？ - 孫柏文
鄭若驊司長訪英跌親，跟住話因養傷唔返香港。之後《金融時報》爆料話，鄭若驊原來想辭職，不過最後經北京回港繼續做。 資料圖片 適中字型 較大字型
早幾個月，孫柏文被新加坡國營新聞台訪問。嗰陣啱啱係特首林鄭錄音流出之時，當中佢話過就算想辭職，都唔得。我喺訪問中被問到嘅時候，我都好有保留咁話：「佢咁講都係因個個想佢搞掂個爛攤子先。」
原因係人類歷史中，得一類人係想劈炮唔撈都唔畀。係乜？就係奴隸。到咗數周前，鄭若驊司長訪英跌親，跟住話因養傷唔返香港。當時我反射式反應係，唔通佢想變節？
點知周末英帝《金融時報》爆料話，鄭若驊原來想辭職，不過最後經北京回港繼續做。而佢老公間公司，就即被競委會查。當年我有份搞嘅獅子山學會，喺對抗「反競爭法」立法時，曾多次警告過，咩叫「反競爭行為」非常主觀，有絕對機會淪為政府向人嘅經濟面勒索之工具。
今次有冇？大家自己諗。當年我哋咁講，仲要被湯家驊統領嘅飯民左膠圍攻抹黑。飯民覺得不斷膨脹政府權力是光明之路。
不過幾年前，我曾喺林依麗嘅網上節目預言過：「就算七百萬人站同一邊，都難打。」見司長、特首嘅遭遇，佢哋所做，如真係被動，我就真係覺得，原來國家奶水嘅味道，真係啞子吃黃蓮了。
最弊係睇海航、安邦、大陸銀行。國家三萬億美元外滙儲備，如扣除有國家保證單位發嘅外債，及零回本機會嘅一帶一路項目，儲備基本上係零。奶水味道係點我唔知，不過快斷流。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.entertainment.appledaily.com
