中美貿易協議表面睇條款甚辣，除咗要求中國未來兩年增購2,000億美金美國貨之外，仲針對知識產權同技術轉移作出限制。不過，除咗關稅、
增購美國貨提早開放金融市場之外，其餘範疇龍門似係任搬，今次中國表面俾美國恰到上心口，但你話中國會貼貼服服跪低，講都冇人信。對投資者嚟講，更實際嘅係，點樣先會觸發中美再反枱，拖累大市下跌，聞到臭味，就博高位全身而退。
回顧對上一次中美反枱之時，係舊年5月初。由舊年1月至4月，當時中國以宣示有力維穩滙率為前提，保住人幣喺7算內，離岸價由接近7算升返去6.7，港股同期出現大型反彈，之後中美反枱，人仔9月跌至7.2。
中國近期唔反枱，或許有兩個原因，第一，要先睇美國民主黨總統候選人誰屬，先諗對策，目前以溫和派拜登佔先；第二，中國先穩定經濟、股市，股市升等同向政治勢力派餅，穩住自己陣營先再對外反擊。
咁點先係反枱較佳時機？由9月至今，人幣反彈幅度同舊年首季相若，而觀乎舊年首季，人幣2月尾升勢已見盡，但仍能喺6.7水平橫行兩個月，嗰兩個月港股依舊暢旺。目前距離民主黨初選仍有時間，而港股喺高位承接力唔錯，氣氛似保得住，睇A50（2823）個款，甚至似有種最後派對嘅感覺。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com
