政府賣廣告，廣告費當然是來自公帑。
然而，點先可以用得其所？首先，賣任何廣告，都要合時兼到位，但你看近幾個月的政府
廣告，從「珍惜香港這個家」、「止暴制亂」、「與暴力割席」到近排的警察招募一套四款「如果你想守護香港」，統統都係時間、人物、地點錯曬。道理很簡單，你有冇見過，當國泰、滙豐、港鐵出咗事嘅時候，會唱反調大賣廣告？傻嘅都唔會啦！因為只會事倍功半，廣告費，等如倒錢落海。
再者，廣告當然要講求創意、好的文宣、有影響力。你看這些政府廣告的弱雞文宣，加埋近乎「零design」，真係令人懷疑是否因為沒有廣告公司肯接政府job的關係，搞到質素咁差。
「與暴力割席」的宣傳片，以為要同年輕人溝通，就要出YouTube、商業二台，又要rap又用黑白色強烈對比。仲要大力標榜「年輕人追求自由，其實香港已經很自由」……咁就出曬事，由始至終政府都不明白同一個道理：年輕人要被說服，並唔係你講佢就信，一個沒有根據的理由，越講只有越唔信。
這兩天在紅隧港島入口，警察買咗塊好大的廣告牌，上面寫咗「如果你想守護香港」，下面就話「請即投考」。訊息無疑好清晰，但bad taste到一個點，不但用了死人藍，而且沒有丁點設計，幾十萬的廣告費，同燒銀紙有何分別？
好的文宣，除了要有好的的文筆之餘，更需要好的內容，它要感人、與人相關、有啟發、有提升、有意想不到、有增值、有共鳴。要做好社會宣傳，其實真係唔係咁簡單，與其「平霸」洗腦式和「自high」式去亂做，不如虛心跟蔡英文偷嚇師，睇佢點做social同用KOL去打動大班年輕人啦！
文迪晞
mailto:heyadmen@gmail.com
廣告經綸 - 文廸晞 舊文
來源 source: http://hk.entertainment.appledaily.com
