肺炎疫情擴散到失控水平，出動到封市，未來幾日會唔會封多幾個市？結果疫情失控對股市發起二度攻擊。中央防疫之餘，亦要防股市暴跌，更重要
係唔能夠因為防疫鑄成大錯而失民心，封完市、震一震A股，令到舉國震驚，等人民自行調節防疫，係鑄成大錯之後冇辦法之中嘅辦法，要犧牲嘅係幾個月嘅消費市道。
A股跌一棍深嘅，中央有必要維穩股市，至於港股已跌兩大棍，疫情負面情緒之下，難以單一日回升就恢復信心，換句話說會將之前喪炒進度延後，同疫症冇咁關事而喺疫症爆發同時想炒上嘅股，會相對快啲復蘇，舜宇（2382）周四收市價相比肺炎跌市前嘅周一收市價仲要高，當大跌市恐慌性拋售轉變為人心虛怯嘅波動市況，舜宇應該有條件炒高。
美團（3690）一度跌穿紅底，但向來同舜宇係輪流炒格局，相信美團大跌後要更長時間恢復，短期內最大問題係車手因中招高危行業，需要更大額補貼，利好嘅係疫症令送餐需求增加，會同時提升用戶黏性，效應會長期持續。總括嚟講，疫症係令美團短期受害、長遠有利，當然第一步反映咗短期受害先。博一轉舜宇炒完，再返撈美團未遲。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com
