近日香港受到武漢肺炎摧殘，不少專家以慘過沙士來形容，理論上樓市應該下跌。問十個專家，十個都會話跌，我不是唱
反調，我亦認為樓市會下跌，但很奇怪，中原指數連升四個星期，製表人都唔知怎樣解釋，唯有話疫情對於樓市影響，將會在下星期反映出來。
這個解釋在兩個星期前已經用了，可能製表人忘記，其實樓市點解唔跌，最簡單解釋就是成交量太少，冇人減價賣樓。不過，亦不代表大家可以用幾個星期或者幾個月前的成交價賣樓，千祈唔好咁開心。
業主可以唔賣樓，主要是防守力強勁，在2003年沙士期間，不少業主同時擁有幾個單位，樓價下跌，最簡單又最直接方法就是減持手上單位，市場供應突然增加，樓市又怎能夠唔跌。現在大多數業主只是持有一個單位，唔供樓都要租樓住，少人賣樓，樓價自然沒有那麼容易下跌。
沙士期間供樓，利息比現在多一倍，現時銀行可以還息不還本，大多數業主的現金支出比租金還要低，一般業主明知樓價會下跌都唔會賣樓。
沙士期間賣樓的人大多數不是業主，而是銀主，他們賣樓又快又狠，但價錢就唔會好，影響到其他成交價亦不理想。金管局為了壓抑樓市升勢而推出逆周期措施，令到大多數業主的負債比率非常之低。本來，很多業主都表示不滿，但今次疫情，因為有逆周期措施，大多數業主都沒有財政壓力。
湯文亮
mailto:jacinto.tong@gmail.com
本欄逢周二刊出
亮說亮話 - 湯文亮 舊文
來源 source: http://hk.entertainment.appledaily.com
