美股跌千點翌日，當然冇人估到港股最多只係跌100點左右。美股Zoom完全當跌千點不是一回事，
愛康醫療（1789）、新東方在線（1797）當冇事再炒過，後市兩極化熱炒形勢相信仍然誇張，除咗強勢板塊輪流炒，資金亦會喺其他低市值新興板塊尋寶。女仔手遊股近排已經炒起，市值仍低，睇怕未見盡，落後嘅話仲有做遊戲平台嘅創夢天地（1119），大圓底兼近期成交逐步增加，值得留意。
之前本欄提及，桑德斯喺民主黨總統初選領先，共和民主兩黨對華強硬派硬碰硬，將令到資金繼續傾斜於不受貿易戰影響嘅新興板塊，助長兩極化情況。
喺呢個時候，會德豐（020）、九倉（004）同九倉置業（1997）齊齊停牌，市傳吳光正家族私有化會德豐，係令吳宗權管治會德豐更輕鬆？無論點都好，佢老豆吳光正向來無寶不落，上次2018年尾以介紹上市形式分拆九倉置業之後，港股2018年就跌到一仆一碌。今次如果將會德豐收為己有，變相增持海港城、Times Square等等資產，睇好香港？睇好周期股？揀得呢個時間絕對有其考慮同眼光，周期股長遠前景睇嚟不能忽視。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com
