講個笑話畀大家聽吖……從前有個醫管局，佢買唔到口罩。係呀，好好笑㗎。點好笑？話說上星期，一班有心人搵來一大批韓國口
罩，係相對貴嘅KF94，諗住捐去醫管局，為醫護紓解燃眉之急，數量都有4萬個㗎！
有人出錢，有人出力，只欠收貨！經人穿針引線下，聯絡上醫管局……然後，醫管局嘅反應，會令你唔單止懷疑人生，甚至懷疑世界。
當你話你有口罩想送畀醫護，醫管局表示：「你先畀7隻口罩我驗，我哋check完過幾日覆你。」OK……嘅，作為專業醫護，對口罩有要求係應該嘅。點知……問多兩問，「係啦，批口罩咩色呢？」黑色。「黑色，咁不了。」聽到呢度，相信大家都好明，點解醫管局買唔到口罩。連免費嘅口罩，佢都要驗7次，仲要等幾日先覆你……再講落去，「黑色？不了」，醫管局坐享其成，仲可以有「不能買的口罩」？我明，黑色口罩，容易招人話柄：「呢隻咪暴徒口罩？」天啊！醫護上戰場，呢個時候仲政治行先？難道消防入火場救火，要拎鐵筆破門，你會話，「呢個唔用得，同暴徒用嘅武器係一樣！你徒手撬啦！」
醫生朋友，聽到我哋嘅經歷，嬲到著曬火：「HA落咗order，由今個星期開始，唔可以再book elective照腸鏡！知唔知點解？好明顯係因為唔夠PPE！」醫生解釋，除非病人入咗急症，大量屙血，如果唔照唔醫一定會死，先可以去照一照。
咁換言之，想及早發現、及早治療？Sorry，唔夠裝備噃！點解唔夠？咁就要問返醫管局係咪太離地、太官僚啦。
買口罩，就跟足指引，買來買去都買唔到；起檢疫中心，就因應疫情，無招標直接搵人起；唔封中國關，就因為唔想助長歧視、針對性排斥；封南韓關，就因為控制疫情，將社區傳播截斷。公我贏，字你輸。呢個政府，真係好有趣。
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.entertainment.appledaily.com
