上星期五的千點反彈，噚日一筆勾銷，好友開心一日又再灰爆，恒指上周四低位21139能否成為短線支持？現時就算股神話係你都唔會信。肺炎疫情持續蔓延，
經濟衰退迫在眉睫，觸發環球股市暴瀉，但止跌與否已不是估值平貴的問題。
簡單而言，2008年起因各國央行印鈔而吹起的各類型資產泡沫，到了12年後的今天，因為一場疫情要奉還。君不見各國央行不停放水，但股市反而越跌越急嗎？正正是市場拆倉活動不斷，要錢唔要貨的結果，話之你估值有幾平。央行目標係防範系統性危機多於托市，去槓桿活動一日未完，股市一日都會繼續跌。
咁去槓桿活動幾時會完？只能夠由市場話你知，正如金融海嘯，恒指去到貼近1萬點才企穩，我自己的操作方法，已由每跌1,000點撈貨，改為揸住小量股票作核心持倉，保住市場觸覺，兼有淡倉對沖。每次裂口大跌，如見心水股插水，則小注博反彈，但盡量即日埋單，以免有蟹貨囤積。建倉寧等整個拆倉活動完結才出手，雖然會買貴咗，但總算買得安心。
講到尾，今次跌浪非同小可，最緊要保命，寧願現金為王，正所謂留得青山在，哪怕冇柴燒？
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.entertainment.appledaily.com
