利字當頭 - 利世民 2020年3月26日
「嘩，兩萬億，個市仲唔升？」一、兩日，或者係，但長遠來講，對一個有三億人又儲蓄率極低嘅美國，兩萬億，真係幾星期貨仔。
美國疫情仍未見頂，封城嘅趨勢應該會繼續，事實上，美國唔少州分雖然未正式全面social distancing，但公立學校已經決定，今個學年提早結束。
「咁又點？」好多嘢唔講大家唔知；美國唔少地方，小朋友唔返早就連早餐午餐都冇得食；當然，呢啲小朋友嘅父母，亦可能係手停口停。你自己諗下，骨牌效應可以有幾嚴重。
另外，美國極有可能會爆發新一輪按揭斷供潮；已經有唔少人講，聯儲局嘅無限量寬，亦要買入按揭證券；估計五千億美元起跳，即係單單呢個環節嘅規模，已經同過去嘅量寬差唔多。股市呢？本來就已經要調整，但現時除咗借勢，亦真係有轉勢嘅情況。換句話說，無人知聯儲局嘅無限量寬規模最終會有幾誇張，或者真係會遠超大家嘅想像。
有唔少朋友話，疫情過去之後，實體經濟始終會返來。樂觀就咁諗啦。但亦有可能係，當個disruption維時長到某個位，真係會有重新組織全球供應鏈嘅可能；當然，生產同出口越係權重高嘅國家，就越可能受影響。所以，中、美甚至德國等，都會面臨一個適應期。至於邊個社會制度最有彈性，將會係關鍵。老生常談嘅survival of the fittest，中文譯做「適者生存」；留意，唔係強者，係適者。即係話，adaptability先係關鍵。
利世民
http://fb.com/leesimon.hk
本欄逢周二、四刊出
利字當頭 - 利世民 舊文
來源 source: http://hk.entertainment.appledaily.com
