假如禁酒令一出，餐廳酒吧一律不得賣酒。但根據林鄭話，不能賣酒還可以做其他嘢。不錯，從市場推廣角度，仲可
以賣零酒精啤酒，如嘉士伯即時靚抽，「零酒精，有冇接觸，自己話事」。不過，唔知道一班朋友以「飲酒心情」去飲零酒精啤酒，會唔會一樣越飲越興奮做出一些「親密行為」，繼而增加傳染機會？
街上禁飲，在家仍然可以暢飲任飲。悶悶地，招呼朋友去自己屋企飲，唔知會唔會比起街上更危險、變得更親密，導致感染更多呢？
其實，推行這個方案，唔一定錯，禁酒令之類在外國也有實施。今次迴響咁大，又係源於林鄭的溝通技巧和策略思維。假如事先進行業界溝通，雖然反對一定預咗，但可以安慰大家唔需要咁灰，一齊訂立一個期限，共度時艱，例如在未來三個星期內新增個案減至單位數字，我哋就立即恢復餐廳酒吧供酒，仲可以借力令到香港人更加同心抗疫，這才是領袖應有的責任與風度。
林鄭話飲多咗酒就會發生親密行為，唔單止酒吧老闆聽到扯火，連普通市民都覺得費解。如果真的要歸咎酒精，倒不如話飲多咗酒嘅時候警覺性及防禦能力會減低，所以比起一齊食飯相對高危更易入耳一些。
正所謂牽一髮動全身，禁酒令一出，受害的豈止酒吧食肆，連帶供應商、運輸人員以至酒吧業界前線從業員，如調酒師、侍應、拳手和好多與酒吧、酒樓、卡拉OK唇亡齒寒的promoter（俗稱「啤酒妹」）的生計都會受到嚴重影響。仲有大量酒精飲品，囤積過期變成垃圾。有人講笑話，不如在禁酒令生效前，搞一個大型推廣活動，賣曬及飲曬市場上的存貨；但這個做法太危險，所以，最好辦法還是政府負責買曬所有酒精飲品存貨，再向以上受影響的老闆及打工仔作出合理賠償。
文迪晞
mailto:heyadmen@gmail.com
廣告經綸 - 文廸晞 舊文
來源 source: http://hk.entertainment.appledaily.com
