美國2萬億美金救市方案通過後，會唔會即刻出強硬措施、速戰速決以免疫情擴散？係嘅話唔排除再嚇一嚇市場。執
筆時VIX期貨喺40獲支持開始反彈，走勢同2008年10月下旬有點相似，睇返08年VIX反彈嘅同時，美股係再跌多浸。反正過去3星期，星期一都係大幅裂口低開，現時估個市震多次先，揸現金嘅朋友可博到個低啲位撈貨。
喺市場流動性危機發生嘅時候，美股波幅大增，投資者最想見到唔係單日升2,000點嘅報復式反彈，而係想見到股市重返低波幅時期。無論你睇好定睇淡後市，都係波幅決定命運。睇標普500指數月線圖，跌破保歷加下軸之餘，仲喺高位形成咗擴散三角形形態，當然唔講都知現時投資者情緒非理性，如果未來一兩個月能夠重返低波幅，反映擴散三角形呢種極危險嘅偏淡形態失效，就證明好似當年87股災之後，以低波幅重返牛市了。
如果稍後流動性危機紓緩，遊資再多都冇能力令股市大幅抽上，因為所謂「無限QE」其實冇大驚喜，難令市場亢奮。如果變返低波幅，大家對經濟依然欠缺信心，資金氾濫亦主要流去美債，同疫情關連度低嘅股票，相信總好過揀超低殘嘅災難板塊。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com
