【大茶飯】股市受難後復活（青冰）
【大茶飯】股市受難後復活（青冰）
復活節假期前，環球股市都反彈咗唔少。更多
在復活節假期前，環球股市都反彈咗唔少，上月9日因沙地打石油戰而引發的環球股災，至今過了一個月，依家真係應曬節喇，死完之後復活。
美股上月跳崖式下跌，上月9日道指係23851點，標
普係2746點，當天兩個指數都跌約8%，不過這個只是受難的開始，道指最低要見18591點，標普最低係2237點，假設你第一天就別人恐懼你貪婪的話，仲要挨多兩成價先見底，不過經過環球瘋狂放水，標普在復活節前復活了，收報2789點，比起上月跳崖日高1.6%，道指就差少少，仍跌0.6%，經過幾星期的受難而最後復活，相信投資者都會收貨。反觀恒指就曳啲，3月9日收市係25040點，復活節前收24300點，但有隻大象仆低咗，這段日子要跌3%，可以理解嘅。
青冰的操盤套路，升跌市都係會採用汰弱留強，但今次的市況的確係相當凶險，以往用開的策略難免受到大考驗，尤其是身處環球股災，弱的股份狂瀉，強的股份只係跌少啲，跟住每日仲要面對連串壞消息，最後都只係盡做啦，弱的斬曬，強的都唔敢留太多，幸好2月時都聞到有燶味，不斷提升現金水平，不過以上月9日同上周比，跑輸恒指啲啲，仲未復活到，慶幸嘅係，今年仲係跑贏不少。
一招記錄交易 不時檢討
這個周末做了個檢討，是咁的，將3月9日收市後的倉位mark低，然後用4月9日的收市價再計一次，睇嚇表現如何，個意義就係，假設這段日子用鴕鳥政策乜都唔做，會唔會比汰弱留強更好呢，結果都鬆咗一口氣，有為勝無為，輸少兩個巴仙啊，戰友可以拎返上月個結單同上周比較嚇，究竟這一個月以來乜都唔做，是否比現況更佳。再睇細緻啲，就睇個別股份的表現，上文都講唔少市場都復活，究竟當日倉位的股份，究竟上水未呢，點樣去分強弱，一眼睇清，如果倉內弱股佔多數，就反映揀股方面要再下苦工喇。
投資係極為個人化之事，適合青冰的方法，不一定啱你，最弊係戰友們經常跟專家們的方式，但落得不一樣的下場，可能眼見專家們出出入入大有斬獲，自己就輸死了，但都仲未明錯喺邊度，其實簡單的拎個excel記錄交易，不時用心作檢討，客觀的數據，總比主觀的觀感更有裨益呀。
青冰
http://www.fb.com/chingbing888
本欄逢周二刊出
大茶飯 - 青冰 舊文
來源 source: http://hk.finance.yahoo.com
