港股反彈已經接近一個月，以周線圖計，已經踏入第四個星期。根據過去一年4次港股短期反彈浪嘅慣性，長度普遍為期4星期，完結
後便進入調整期。反彈浪去到6星期已屬罕見，好似舊年12月至今年1月中，反彈浪超過6星期，後期已經炒到禾雀亂飛。目前牛證街貨重倉區25000點至25100點，升到呢個水平唔出奇，但以反彈市時間長度計，如果升浪持續多一至兩星期，就已經不得了，禾雀亂飛最終能夠引到散戶重新入場。
睇返周一美股下跌超過1%，但Apple、Tesla、Amazon逆市炒高，反映資金開始唔理指數而活動，市場氣氛升溫。而港股微升135點，成交1,115億，但個股炒風頗熱，醫療股、物管股又炒過，希望呢種情況維持多幾日。
炒風越見熾熱，但以指數計，反彈浪就肯定係倒數階段，皆因反彈市恒指累積升3,407點，算係彈到末段。操作上，低位反彈等到𠵱家嘅持股可考慮脫手，改為限注短炒。
反彈浪見頂徵兆？可睇實海螺（914），之前兩次大陽燭、大成交突破保歷加上軸，後市就冇運行。海螺貴為優質周期股，強極亦應有限度，如果走勢太high，後市要小心。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com
