孫柏文諭：呢排撈底撈得好開心嘅人士注意，小心揩嘢。老實，全球股市大插插之後，大家都心鬱鬱去撈。但幾時可
以all in瞓身買嘢嘅指標，一定係睇實股神畢菲特幾時出擊。當然，好似08年咁，佢買得嘢時，一定係因啲公司求佢救命，當你買股，佢就有啲定息可換股債。所以，上周當市場好似穩定下來，佢減持美帝啲航空股，就成為撈底人士兜口兜面淋嘅一盆冷水。
講時序，佢旗下巴郡揸咗各大美帝航空公司大約10%股權，攞佢上周沽貨嘅Delta，到二月中都賣緊58蚊。二月尾，跌落到48蚊，巴郡增持！去到三月中，再跌到31蚊時，股神被問到會否沽航空股，佢一句「No」回應。點知，上周就喺30蚊樓下減持至再唔使披露。點解呢？巴郡話到五月初股東會先回應喎。
我當然仲好信股神嘅眼光同投資法。所以，佢大跌後，政府推埋救市措施，都仲選擇沽貨，係個超級大警號。以佢話靚股唔怕揸一世嘅邏輯，最直接解讀係，做航空公司股東，冇得守、被屠清。
我嘅解讀，就係巴郡覺得呢啲航空公司全部都會破產。佢哋唔會執笠，只係所有現股東輸清。債權人被迫債換股，做新東主。過去十年，邊個借得多，就贏。所以個個債台高築。水一退，個個在裸泳。大家撈底撈得小心啲啦。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.entertainment.appledaily.com
