【智取大市】捕捉AI先驅行業 - 晉佳
智能家居係最為簡單嘅AI場景，開發難度遠比無人駕駛、辦公室AI應用低，估計會率先成功開發。資料圖片
智能家居方面，究竟會有幾大商機？目前所謂嘅智能，只係流於連線wifi，用app去控制家電，例如將飯煲set wifi同set時間去煲，只係手機取代
remote control可以室外使用咁解。如果缺乏AI、大數據嘅元素，家居其實難以真正高度智能。
所謂去到智能家居廣泛應用嘅情況，當然仲有漫漫長路，可以想像當一個人起床，AI鏡頭detect到，隨即按照用家生活習慣去做唔同任務，自動煲水、自動煮咖啡、自動開熱水爐等等。
一個device亦能夠連繫另一個device，例如有個取代吸塵機嘅掃地機械人掃好地下，然後喺預設情況下，有個抹地機械人喺床下底行出嚟抹地，地下太大？一次過打掃唔曬，佢哋會乖乖自己返去床下底叉電，叉滿電又做埋其餘任務，亦懂得唔妨礙人類之下進行任務。
另外，根據大數據去到回南天，抽濕機會自動開著幫你適當咁抽濕。喺有AI、人面辨別、VR、5G嘅世界，呢類功能可以預計遲早發生，家居算係一個最為簡單嘅AI場景，開發難度遠比無人駕駛、辦公室AI應用更低，所以估計亦會係率先能夠成功開發同應用。
如果以開發較低難度智能家居產品開始，應該有能力即將起步，股價亦唔會需時好耐去反映。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://s.nextmedia.com
