【利字當頭】國金中心 誰說了算？ - 利世民
香港嘅金融中心地位，所謂國際元素，唔係冇，但冇大家想像中咁穩陣。資料圖片
「你信唔信後門立法之後，真係會動搖香港國際金融中心地位？」同事問。
「我唔識答。」「你唔係成日話，香港國際金融中心地位，一係因為法治同合約精神，二係聯繫滙率咩？」
「無錯。」「後門立法，仲唔係破壞法治？」
「我話唔識答，係我已經唔知道，何謂國際金融中心地位。不如你又話我知，純粹以股市去睇，香港其實係有幾國際？上市嘅絕大多數係大陸企業，就唔在講，但其實買股票嘅，又係咩人？」
實情係乜，我諗大家心裏有數；香港嘅金融中心地位，所謂國際嘅元素，唔係冇，但亦都冇大家想像中咁穩陣。
「使乜驚？大陸大把錢，外資唔買香港資產，外國企業唔來香港上市，咪專心做大陸嘅窗口囉。𠵱家大陸企業去唔到美國，來香港上市，咪有危有機囉。」我見到有 Nancies 咁講。
「國安法喎，係為戰爭作準備喎，香港失去獨立關稅區地位之餘，分分鐘美國會制裁㗎喎。」當然，有人唔信呢啲連串事件會發生，但我諗起倪匡先生小說《追龍》入面講嘅：「要摧毀一個城市，只要令佢嘅獨特之處消失……」
國際金融中心，真係你話係就係咩？
利世民
http://fb.com/leesimon.hk
本欄逢周二、四刊出
利字當頭 - 利世民 舊文
來源 source: http://s.nextmedia.com
