金手指 - 孫柏文 2020年5月5日
【金手指】陣陣戰鼓敲擊聲 - 孫柏文
97年及07年的金融動盪，都只係覺得會好多人輸好多錢，但今次則覺人身安全都要兼顧。 資料圖片
三月初，孫柏文見美股開始大插插，不過未覺到短線底時，就開始做功課。諗住聯儲局部印鈔機又會隨時再出擊，所以諗住搵幾隻抵買嘅嘢，特別係嗰啲資產負債表好靚嗰啲長揸。
點知，因劣幣驅逐良幣，多年零息政策下，嗰啲唔肯瘋狂借盡去做股票回購嘅公司管理層已被全取締。間間公司啲資產負債表都係爛嘅，債台高築。甚至有債券專家話，今時今日啲有「投資評級」嘅公司，其實如果用同一份資產負債表返回十五年前嘅世界，根本只能被評為「垃圾級別」。
就係咁，四月呢轉嘅美股升浪，對我來講簡直震驚。香港都有呢個情況，隔離地產嘅消息就係樓市回暖甚至見新高。
人在做，人在看。催淚彈代表嘅亂世，啲煙會更濃更廣泛。而當煙霧蓋世，更絕對唔會只係催淚彈。當今各國人民已醒覺，發現二戰後嗰種靠放棄自主權畀啲「專家管理層」系統（博士學位冇民選嘅）已腐化不堪，而心中之矛亦直指騎劫該系統騎劫得最核突嘅中國政府。
我呢刻感受到嘅不安，就有如97年7月泰銖貶值，07年滙控（005）發盈警嗰刻咁。唯一分別，就係之前嗰幾轉都只覺會好多人輸好多錢，而錢亦只係身外物。今次則覺人身安全都要兼顧。如果唔明，大家可以搵晚淩晨，企窗邊，合埋眼，聽嚇從遠處傳來，陣陣嘅戰鼓敲擊聲。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://s.nextmedia.com
