【大茶飯】瑞幸、Wirecard與蒙能（青冰）
【大茶飯】瑞幸、Wirecard與蒙能（青冰）
瑞幸做假賬而被美證監勒令退市，加上事件生於現時的政
治環境下，必受千夫所指，但只要你在市場生活得夠耐，其實你就會明白老千股係古今中外皆有。更多
瑞幸做假賬而被美證監勒令退市，加上事件生於現時的政治環境下，必受千夫所指，但只要你在市場生活得夠耐，其實你就會明白老千股係古今中外皆有，監管好啲自然少啲，民族特性喜歡偷呃拐騙自然多啲，其實係好正常的推理，但市場必然會反映這些質素，點解人哋PE會咁高，點解某些企業市賬率0.4倍不夠冇人要，可見一斑。最近德國的科技龍頭Wirecard出事，而蒙古能源（276）又重振雄風一度急升七倍，相映成趣。
先講Wirecard，身為德國DAX三十隻成份股之一，竟然有165億港元的現金不知所終，核數師拒絕簽核財報，消息令股價幾星期內跌了99.99%，上星期終於宣佈破產了，DAX亦隨即宣佈將佢踢出成份股。究竟唔見咗百幾億係穿櫃桶，還是根本係假數而從來無出現過，青冰冇深究，有興趣的戰友可以自行google一嚇，肯定係非常有趣。你話之前冇人警告過間嘢有假味咩，唔係呀，金融時報2019年初爆料話有高管涉嫌做假數，一度令股價從170歐元，跌至86歐元，接近腰斬，但之後就慢慢回復正常，回升至150歐元樓上，基本上整個2019年，都是紅底股。
蒙能炒變身 市值曾越千億
只要你股齡夠長，必然知道蒙能以前係吒叱風雲的股，前身係新世界數碼，在2000年科網股泡沫時又係炒到癲，當時青冰未入行，經歷唔到，但按理咁多蟹貨的股份好難再有第二春，不過經過2002年及2005年的三次供股，兩次二供一，一次一供二，再來一次二十合一，難聽啲講供到渣都冇，之後就等一次東風，這隻殼就用得著了。
2005年至2008年可算是國企大時代，當中最熱炒的是資源股及礦業股，神華能源（1088）以7.5元上市，2007年炒到57.95元，青冰好記得當日瑞銀有分析員計到，神華目標價係101元，而無數殼股就聲稱買入礦資源而變身，其中蒙能就是龍頭，市值炒到過千億，MSCI都要將佢納入香港指數，可見當日係幾咁瘋狂，至於蒙古是否真係有煤礦，戰友去研究嚇吧，最搞笑係青冰搵料時發現，當年內地財經雜誌曾對蒙能提出六大質疑，簡單啲講係話佢假，仲被內地封為大中華第一妖股，至於港交所（388）及證監會是否把關不力呢，你懂的。
瑞幸做假，要退市，理所當然吖，但當日美國證監點解會睇漏眼，還是隻眼開隻眼閉？當日的保母團包括瑞信、大摩、中金及海通，後兩者大家自己諗，但瑞信及大摩都係國際級投行，係咪都咁易受騙呢？
若問瑞幸、Wirecard及蒙能何者最強，答案顯而易見，一個退市，一個破產，只有一個是飽歷風霜，多年來屹立不倒的，你說對不對。
青冰
http://www.fb.com/chingbing888
本橍逢周二刊出
大茶飯 - 青冰 舊文
來源 source: http://hk.finance.yahoo.com
