金融High Tea——新盤開售就得食就食
美國宣佈回應港版《國安法》的框架，市場覺得未有具體內容，比想像中寬鬆，港股趁勢大彈。美國黑人疑犯死亡引發多州暴動，令總統特朗普「倒瀉籮蟹」，消息反而令人覺得可能會分散對港注意力，對大市氣氛都有幫助。
拜登選舉採放冷槍戰術
美
國警方拘捕黑人疑犯時施以膝壓，結果導致黑人疑犯死亡，整個過程被手機拍下，結果竟然引發多州暴動，要出動國民警衞軍平亂。準備競選嘅民主黨候選人拜登乘機出招，質疑總統特朗普嘅應對。自新冠肺炎疫情喺美國爆發後，拜登成為「躺著的贏家」。針對特朗普說話多多嘅性格，拜登現時似乎採取以靜制動嘅選舉方針，低調減少露面，只係偶然出嚟放放冷槍，主要係等特朗普自己出錯。拜登呢個少做少錯嘅做法似乎初步奏效，疫情持續，中美關係又不斷惡化下，特朗普支持率呈現下跌之勢，現在再加黑人示威，令特朗普選情壓力更大。
接連突發事件，令美國經濟急速調整。過去經驗，白宮主人之爭，主要受民生政策影響，如果美國內外交困嘅局面唔解決，本來勝望平平嘅拜登就可能執到死雞。上星期，特朗普話會有硬招回應人大訂立港版《國安法》，但出嚟只有大概內容，有啲雷大雨小嘅味道，即使佢仲可能有後著，但股市玩家都係炒咗先算；加上財新公佈，上月財新內地製造業PMI回升至50.7，較4月升1.3個百分點，重回擴張區間，A股高開高走。上證指數收報2915，升2.2%；深成指數收報11102，揚3.3%；市場交投熾熱，兩市成交合計7616億元人民幣。
港交所炒中概回流睇300元
承接上周五美國掛牌的ADR造好，恒指高開後盤中曾勁彈844點至23806，最終收造23732，飆771點；國指顯著向好，收造9833，抽升272點，成交增至1507億元。
藍籌普遍造好，中生製藥（1177）為最強勢藍籌，升6.7%收報13.02元。早前公佈業績後被唱好嘅美團（3690）相當搶鏡，市前錄逾130億元成交額，最後以上市新高收市，上升2.3%收造150元，成交金額207億元，超越股王騰訊成為成交榜榜首。內地互聯網公司網易（9999）將從美國回流香港，將本周二公開招股，最多集資26億美元，港交所（0388）食正中概股從美國回流熱潮，先升為敬，炒高4.7%收報282.8元，如果市況保持平穩，喺中概股回流熱之下，港交所首站目標會睇300元關口。
房產股昨日表現亦突出，內房股借人民幣匯價回升反彈，恒大（3333）、碧桂園（2007）急揚逾6%；二線股旭輝（884）較突出，飆近10%，收報6.12元。本地地產股借美國反制有限回升番，新地（016）大彈6%報94.45元，恒基（012）、新世界（017）、會德豐（020）都升近5%。
新地假期推售樓盤，雖然政經消息氣氛欠佳，但售出樓盤先賣298夥，跟住再加推118夥。集團策略期望月月有樓賣，今個月預計又會開新盤。同樣，發展商受限聚令影響無賣樓幾個月，雖然最新又有本地個案，限聚令睇嚟唔會撤銷，但估計暫時亦唔會收緊，發展商抱住有食唔食、罪大惡極嘅心態，唔會再等完全撤限，所以今個月都會陸續開盤，當中以長實（1113）推售嘅日出康城項目有過千個單位規模最大。長實近兩年無點投地，土地成本控制得比較低，以現時樓價日出康城新盤就算價錢唔攞到最盡，利錢都相當唔錯，既然政治環境短期唔會好明朗，把握機會賣樓仍係明智做法。長實收報43.45元，升逾3%。
陸羽仁
金融High Tea - 陸羽仁 舊文
來源 source: http://hd.stheadline.com
