【操盤手劄記】「疫」來順受三類股 - 割柑人
香港電視旗下HKTVmall受惠疫情爆發，銷售急增，前周發盈喜，隨網購習慣成形，港視業績可望持續改善。 資料圖片
疫情未了去又來！美國上周連續3日新增確診逾6萬宗，香港亦第三波爆發。然而，美股、港股依然照升。周一，恒指升0.2%，收25772
，向上勢頭未改，10天線有支持。點解股市可以懶理經濟唔好、企業唔掂，同現實脫節？三個字——錢作怪！
4個月前，3月11日世衞宣佈疫情「全球大流行」，美國亦大爆發，美滙指數由94.65，不足兩周升至102.99；3月23日聯儲局宣佈無限量寬，印鈔買債救市，資產負債表由4.2萬億美元，幾個月間升至7.2萬億美元。印鈔效應，美滙回落，股市炒上。
股市動力取決於三大因素：盈利、利率、風險偏好。盈利係賺企業嘅錢，利率係賺央行嘅錢，風險偏好係賺老散嘅錢。以現時市況睇，疫情打殘企業，好難賺到企業嘅錢；但全球央行量寬，則好易賺到央行嘅錢；風險胃納上升，亦見賺錢機會。
疫情之下，企業普遍難捱，但科技企業就食住上，皆因疫情凸顯互聯網重要性，數碼經濟崛起。今輪升浪，科技股領漲，美國Nasdaq同中國創業板指數屢屢破頂，香港上市嘅ATMX亦不遑多讓。除咗科技股，疫市奇葩仲有醫藥股同必需消費品股。
香港第一電商股香港電視（1137）旗下HKTVmall，主打必需消費品，疫情爆發以嚟，日用品、食品銷售急增，前周更發盈喜，預告上半年扭虧為盈，最少賺9,000萬元（未計政府保就業嘅1,630萬元補助），係2015年推出電商業務起，首次賺錢。隨著第三波疫情爆發，網購習慣成形，港視業績可望持續改善。事實上，該股營運現金流上年變幅已由負轉正。業務發展方面，港視除咗開拓保險金融業務，亦開拓外賣自取業務，以CEO「魔童」王維基嘅戰績，值得期待。
割柑人
本欄逢周二刊出
操盤手札記 - 割柑人 舊文
來源 source: http://s.nextmedia.com
