【大棋局】韭菜牛vs制裁熊 - Mr. Tregunter
港股今浪反彈已有跌幅6成，亦已補回周線大裂口，26000點以上係火中取栗。 資料圖片
中港股市正面臨一場競賽：大戶韭菜割得快，還是美國制裁玩得大？港股現下與A股同步率高，恒指補回26000點周線裂口後徘徊，
上證升穿3400點後亦在徘徊。內地媒體吹行風今浪係牛市，原因在中國經濟仆直。
中國2020年官方財政預算，係以GDP增長率5.4%為基準。武漢肺炎，停工；長江沿岸水災，報道少；傳中國海外公民要向內地政府交所得稅，未見否認。今年GDP已無法達到5.4%，大家都知道經濟仆直，所以股市要升。因為自2008年金融海嘯後，每當經濟出問題就以量化寬鬆解決。在無錨貨幣時代，資產價格只屬貨幣現象。所以內地媒體吹今浪係牛市，就好似足球員褲襠跌支士巴拿出嚟，係好合理。
但經歷過2015年教訓，今浪上證升穿3000點後，內地媒體口風轉為要呵護「健康牛」。官方亦然，中國證監會出手打擊非法場外配資，銀保監會亦發聲，嚴禁銀行保險機構違規參與場外配資，嚴查亂加槓桿和投機炒作行為。
2015年股災主因係孖展放得太盡，當時滬深兩市合計融資餘額最高去到22,922億（人民幣，下同），而今浪截至7月10日，兩市融資餘額為13,014億，約為當時六成。
今浪屬熊市最後反彈
再大放孖展冇可能，亦無法期望實體經濟支撐，在印銀紙動作落實前微升或有，大升好難。印銀紙大升市係一種樂觀期望，然而中國面對現實上多重掣肘。中國M2 213萬億再印銀紙，人民幣係咪要貶值？人民幣貶值走資係咪更嚴重？走資外滙流失加劇貶值，美國係咪會指中國為滙率操控國？最重要係，縱使官方希望出現慢牛，大戶唔係咁諗。錢落自己袋先係錢，在印銀紙動作落實前，大戶先割一轉韭菜機率相當高。
另一邊廂，因為港版國安法人心惶惶，美國制裁動作排住隊等上，最嚴重者自然係被討論得最多的港元地位問題。美國在香港有利益，也須顧全華爾街與列國在香港利益，所以不會一下就大動作。情勢使然，中資從美國退市，退市執手尾要幫襯的係華爾街；搬到香港上市，上市執靚仔要幫襯的亦係華爾街。一退一上食你兩轉，等上完市就差不多顧全了華爾街短期的利益。
在如此背景下，不相信有牛市，今浪只係熊市最後亦最迅猛的反彈。金融海嘯第一下大跌，緊接著反彈跌幅一半。港股今浪反彈已有跌幅6成，亦已補回周線大裂口。最後一夾通常有兩三個月，但26000點以上係火中取栗。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://s.nextmedia.com
