【冰說聰明】禁堂食助日清破頂 - 青冰
全日禁堂食及二人限聚令正式實施，食肆被迫轉做外賣，為日清帶來新商機。資料圖片
全日禁堂食及二人限聚令正式實施，食肆被迫轉做外賣，但唔係所有打工仔都有地方食飯嘛，這令青冰聯想到日清（1475）的新商機，以自己為例，這半年來已不會在外吃早餐，在家煮個
麵或烏冬先出門口，兩款產品都係出自日清，現時全面禁堂食，無論是早餐還是午餐，為求方便，應該更多人食丁麵或杯麵吧。
作為疫情股，日清當然冇港視（1137）咁具爆炸力，港視有齊所需用品及食品，仲要送到去門口，定單必然急升，早前已將免費送貨的門檻提高至800大元，但物流就變成了樽頸位，青冰上周四落單，最快都要今星期六先送貨，昨天看到港視fb專頁話，由於有兩成員工需隔離而無法上班，送貨時間將會有延誤，如果戰友急需食品及日用品，只能衝落街去超市掃，這亦窒礙了港視顧客落單的意欲。
日清沒有物流樽頸的問題，你去各大超市都能輕易掃貨，可能因為咁，近日大摩及大和，都相繼調升日清的目標價，分別睇8.6元及8.2元。正常嚟講，摩笛吹奏，點都勁過大和，但在日清身上，就是另一個故事，青冰翻查大和自去年6月起的報告，7次調升目標價，有6次都係到價，唯一唔到嗰次係去年11月，目標價由6.81元微調至6.95元，但評級就由買入降至持有，股價在一星期內累跌兩成，可見大和報告對日清，係舉足輕重。
最新的報告係咁講，指內地銷售已回復正常，隨著在上海的食品合營公司在6月開業，管理層有信心內地收入有雙位數增長，而本港禁堂食的措施，將帶動第3季杯裝麵需求。半年業績要到8月中下旬先有，但在日上市的母公司日清食品，將於8月5日公佈業績，而日清去年的盈喜，亦是在母公司業績當日發出，想入場的戰友，要mark低個日子喇。
青冰
http://fb.com/chingbing888
冰說聰明 - 青冰 舊文
來源 source: http://s.nextmedia.com
