【笑到最後】美股敢買就敢贏（高明）
高明建議，美股可以一股股咁買，以一部iPhone價錢為上限，買一股，入場感受嚇股價升跌，輸曬當跌咗部iPhone。
上連登睇到，好多新手炒美股閒閒哋都贏三四成，仲可能只係呢一兩個月嘅事，除咗搞到其他未贏到嘅連登用戶懷疑人生之外，亦都見到最近呢幾個月只
要敢買落美國科技股上面就有得贏。
其實要捕捉嗰啲股票都唔係咁難，當佢啲產品賣到你手上，或者你出街有機會用到見到，命中率都唔低。所以有冇買嘅分野，只係在於敢唔敢買，技術成份唔高。
過去一年，由香港一頂綠帽而產生嘅國際大事，相信令香港人對美國為首嘅西方世界人點思考，有多咗好多嘅體會。
其中一個行為模式：為咗一個理念，唔介意損害自己利益去開始，換取將夢想實現嘅機會。
近幾個月不斷有新聞話外國放寬香港人簽證，於是坊間紛紛解讀，話香港人質素高、有錢，同西方思想接近。質素高同有錢，高明冇意見。但同西方思想接近，就未必，特別喺個錢字上面，香港人一般都係量入為出、審慎理財之類，應用喺投資上，第一時間就問有冇息收、估值抵唔抵等等。
審慎理財到咗今日就係雙刃劍，香港累積全世界都謀住嘅財富就係靠曾蔭權嗰種謹小慎微香港仔心態。但同樣心態去買美股、去博，就永遠都買唔到宜家狂升嗰幾隻科技股。第一句：貴；第二句：冇息收。心態已經同呢類股票絕緣。
如果以情緒計，美股大致有以下特質：
1. QE之後有好多錢
2. 唔介意一直追捧買未來，但一定要有最尖端科技
3. 如果只係業績好，但科技上唔係第一，股價就只會當普通股票咁衡量。
有一個統計數字，翻查過去納指12次最長牛市紀錄，牛市一旦啟動，12個月後有91%是升，納指牛市冇咁易會完。
如果宜家仲懷疑緊人生，點解人哋賺自己冇份，可以用最簡單嘅「一股策略」：買一股先。美股可以一股股咁買，升得多又拆細，幾百蚊美金一股人人都負擔到，以一部iPhone價錢為上限，買一股，入場感受嚇股價升跌，輸曬當跌咗部iPhone。炒股永遠謹記：冇份贏、慘過輸，除非你唔參加呢個遊戲。
https://www.facebook.com/bigricetea
證監持牌人，持有蘋果（AAPL）。
-----------------------------
【全球樓行】 Dream House零距離
屬於香港人的移民攻略
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS / Android
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！
笑到最後 - 高明 舊文
來源 source: http://hk.news.appledaily.com
