【智取大市】沒有派息 還信內銀？（晉佳）
中行股價潛水，近日才反彈
ATMX單日成交超過350億，單一隻美團成交已經有105億，仲多過頭8隻最活躍成交嘅舊經濟股，但係呢個成交已足夠搶高批舊經濟股。之前揸重科技股嘅基金，基本上賬面贏到開巷，乜價沽都贏之餘，中小型基金基本上可以單日就完成減持
，令現金水平大升。舊經濟股反彈，證明當中有一小撮資金流返去舊經濟股。流動性充裕之下嘅新經濟股套現潮，造就咗新經濟弱、舊經濟強嘅兩極趨勢。
內銀股擺到明基本因素弱，疫情受累，疫後不見得受惠，揹起民企破產爛賬隨時成為國家任務。建行、工行市賬率0.6倍樓下，中行低到得0.37倍，基本上係破產價。而四大行加上招行（5隻最高市值內銀）嘅市值加埋，都不及一隻阿里。
有國家照住，照計唔怕啩，如果一早係咁諗，就會覺得市賬率0.74倍都係超平，如果唔係點做到呢個世紀最大價值陷阱出嚟。
以中行為例，賬面值1.96萬億元（人民幣，下同），截至6月底嘅客戶貸款及墊款淨額13.67萬億元，又有5.37萬億元金融投資，佢嘅貸款質素同埋金融投資，係市場覺得最疑惑之處。
大家可以睇睇業績點樣提及中行嘅貸款質素，喺中國內地10.98萬億貸款裏面，有10.56萬億或96.2%被視為正常貸款，關注、次級、可疑、損失貸款大約4,200億。假如閣下覺得佢提到正常貸款當中，其實有兩成係爛賬，咁喺你心目中，中行係一間負資產公司了。記住，唔係我講，只係假如你咁樣覺得，我阻止唔到你咁諗，你大可相信佢貸款質素非常好。
持有中行嘅理由，最實在嘅就係股息，以中行舊年派息計，股息率係包住糖衣嘅8.27厘。咁高嘅派息率反而令人不安，似乎內銀同投資者唯一嘅信任，就係來自堅實嘅現金派息，冇咗派息，甚麼都不是。今年利潤股息勢減，但估計出年股息好唔得去邊，大弱勢其實係有道理的。
-----------------------------
【全球樓行】 Dream House零距離
屬於香港人的移民攻略
-----------------------------
上車必讀天書 「九成按」入市懶人包
點擊即睇《按揭必讀手冊》電子書
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS / Android
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！
智取大市 - 晉佳 舊文
來源 source: http://hk.news.appledaily.com
