操盤手札記 - 割柑人 2020年11月9日
操盤手劄記｜可踢走777的1137（割柑人）
美國大選轉入司法戰，主流傳媒已急不及待「造王」，情形就似2000年大選，但會否步當年後塵，兩候選人爭訟36日後，被法院推翻賽果呢？姑勿論係點，香港人最關心美國對華政策，一般估計唔會大變，分別只係戰術，特朗普採「隻揪」，拜登則聯合盟友「圍毆」。
不過，對中國嚟講，特朗普似打搏擊，較難捉摸；拜登則似打傳統武術，有套路捉，較易應對。呢場選戰，再次曝露傳媒嘅民調同分析員嘅預測失準。藍浪未見，跌市亦未見。美股異常亢奮，淡友被挾到暈，點解？唔關邊個當選事，係關國會分裂事！參眾兩院繼續由共和黨同民主黨分掌，拜登成跛腳鴨，有爭議嘅法案如加稅、平價醫療、科技巨頭拆骨等，無咁易過。
周一，美股期貨造好，帶動亞洲股市，科技股、醫療保險股繼續開party。港股5個交易日出現3個上升裂口，試頂格局；收升1.2%，報26,016，阻力睇7月高位26,782。本周焦點落喺周四騰訊（700）放榜同周五恒指季檢，上次大熱倒灶嘅美團（3690），今次再成染藍熱門。
除咗恒指，其他指數如國指、科指都會公佈季檢結果。科指7月尾面世至今，30隻成份股並無港資公司，若今次換馬，本地薑香港電視（1137）隨時黑馬跑出，皆因其市值已超過榜尾嘅網龍（777）。
經營HKTVmall嘅港視，8月尾派中期成績表，轉型網購5年首次扭虧，半年賺1億元。集團上周公佈上月訂單總商品交易額（GMV）為5.13億元，按月回升7.3%，按年則升85.9%。集團上月接連推出外賣自取平台同電子錢包HKTVpay，集阿里巴巴（9988）同美團概念於一身，不妨留意。
割柑人
-----------------------------
掌握理財智慧 感受生活品味
investMAN全新網頁 優雅登場
-----------------------------
部署退休 輕鬆達至財務自由
點擊即睇《退休理財天書》
-----------------------------
【全球樓行】 Dream House零距離
屬於香港人的移民攻略
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
操盤手札記 - 割柑人 舊文
來源 source: http://hk.news.appledaily.com
