收市閒情｜Welcome to 「香港國製金融中心」（千頌C）
林鄭今日發表遲到嘅施政報告，成份報告平56頁A4紙，輕輕睇一次，一句概括：精采絕倫！作為打工仔，相信佢老闆看了，也會看得出林鄭的滿滿的誠意。
1：首先，要睇睇今次施政報告標題：「砥礪前行 重新出發」，香港人睇落，可能會
覺得冇咩嘢，「咪又係典型自high自我激勵嘅金句。」金句就係金句，不過親！呢句係偉大的習主席金句，習主席大愛金句全句係「不忘初心，砥礪前行」，大家記住背咗佢。
只要你翻查紀錄，不難發現領導們經常都將「砥礪前行」呢四隻大字掛在口邊，今次特首直頭肉麻到將呢四隻大字成為香港施政報告，變相傳遞出一個訊息：香港施政，僅遵習主席指示，你的金句，就是我的施政金句。
2：標題以外，就要睇舖排。唔好心急住，先回顧上年公佈施政報告先。上年發表施政報告時，已經係10月，當時已過曬721、831、101。
當時施政報告除咗前言講幾句「堅守一國兩制」、「法治是香港基石」呢啲開場白後，好快就入正題，第一部分就係講房屋、之後就土地、民生、經濟問題。咁樣亦都sync返一個論調，就係政府內部官員都相信，香港之所以爆發社運，係因為房屋問題。所以上年施政報告，你都仲見到佢有嘗試用佢認為啱嘅方法去解決社會問題。
不過今年呢？講完「砥礪前行」之後，第二部份係「中央全力支持」，之後就講「堅持一國兩制」同「不忘初心」（都話佢想sync習主席金句啦），就算之後講「走出疫境」，都不忘多謝「中央支持」。喂喂，施政相關嘢呢？天大地大，祖國為大，民生？房屋？講曬大灣區先再講啦。成份報告，「國家」呢兩粒字講咗52次，「中央」講43次，「大灣區」有45次，就好似同緊佢老細講，「老闆，中港融合方面，我有做嘢呢！」
3：第三樣呢，係令我覺得幾嘆為觀止嘅。今朝一路聽佢讀，一路都覺得唔對路，於是睇返份文本啦，就發現一點。
當佢講點樣「鞏固香港國際金融中心地位」，佢係話「深化兩地金融互聯互通」；
當佢講點樣「鞏固香港國際航空樞紐地位」，佢係話「港珠機場合作」，連接航天城去港珠澳；最搞笑係呢句，「《粵港澳大灣區發展規劃綱要》亦明確提及香港的國際航空樞紐地位。」做咗咁多年香港人，我真係今日先知原來香港國際航空樞紐地位，係要由粵港澳大灣區去證明。
當佢講「發展香港成為國際創新科技中心」，佢話「通過國家科技部的支持…香港的創科發展可說是生機勃勃」，然後要大力發展「深港科技創新合作區」，送香港後生仔去「大灣區」打工。
講咗咁多國際乜乜，國際物物，說好的國際呢？上邊咁多單嘢，唔好話亞洲，連衝得出廣東省嘅實際方案都冇！
冷靜冷靜……你咁都唔明？古曰，「世界是中國的」，林鄭用心良苦，係想同大家講，「國際」其實即係「國製」，香港已經成為「國製金融中心」，Welcome to this financial centre, made in China。
by千頌C@堆填區
http://fb.com/winbigwok
http://mewe.com/i/congcchin
-----------------------------
掌握理財智慧 感受生活品味
investMAN全新網頁 優雅登場
-----------------------------
部署退休 輕鬆達至財務自由
點擊即睇《退休理財天書》
-----------------------------
【全球樓行】 Dream House零距離
屬於香港人的移民攻略
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
收市閒情 - 千頌C 舊文
來源 source: http://hk.news.appledaily.com
