天涯移民，何處是吾家？
澳洲、台灣、馬來西亞為移民熱門地點。(資料圖片)
某天，在朋友家吹水，講起移民。幾位朋友都是股壇有名人物，講出來，無人不識的那種。
A君說：「幾年前，我申請移民到馬爾他，要填寫資產，我最初寫2億元，想一想，怕不夠，索性寫夠5億元。誰知，大鑊嘞，原來要講資金來源
，還要從最初的源頭講起……」
我問：「結果呢？」
A君說：「結果咪申請失敗囉。」
我說：「其實你不用寫這麼多，寫三五千萬元，已經足夠，你想申請移民啫，又不是要上《福布斯》富豪榜，使乜寫咁多？」
A君說：「要講資金來源，莫講話三五千萬元，三五百萬元，我都無啦。」
我說：「其實我們這一行，好多人名下都無錢啦，怕麻煩吖嘛。阿邊個邊個，啲股票戶口同錢都在女友名下，怕女友走佬，同她結埋婚㖭。某個大孖沙，幾百億元身家，連銀行戶口都無呀！他是美國人，怕美國查稅吖嘛。」
跟著大家講起移民熱門地點，原來幾乎每一個地方都被查問過，人人都是專家。
我說：「如果不計成本，最好是澳洲188C重大投資者計劃，每年只要在澳洲住滿至少40天，4年累積住滿160天，或者可由配偶代坐移民監，每年居住180天，條件是保持500萬澳元持續投資。這是住得最少的投資移民計劃，據說某位很有名的醫生便是採用了這計劃。」
B君說：「我哋想攞外國護照，都是為未來著草留後路之嘛。4年流流長，萬一真係著起草來，點走得切？」
幾個朋友當中，唯一一個有正當資產的人說：「我有BNO，依家去邊度都得，仲無得引渡㖭。」
按：這位仁兄的確沒有外國護照，非常愛國愛港，不過他的兒子好像已申請入了美籍。
A君反問說：「就算你有BNO，今日的英國，經濟咁樣，疫情又咁樣，你敢去咩？」
我說：「莫講話英國，就算全世界任你揀，邊度先至可以住？」
A說：「台灣。」
B說：「馬來西亞。」
為甚麼馬來西亞比台灣更好呢？理由是：生活成本比台灣低一半以上，這才是真正的天堂。雖然A忍不住最後說：「但台灣女仔比馬來西亞靚好多！」
作者為小說作家、報社主筆、股票投資者，吃喝活樂的專家。 逢周一、三至五刊出
政經密碼 - 周顯 舊文
來源 source: http://www.am730.com.hk
