智取大市｜葉茂林會死錯人嗎（晉佳）
耀才主席葉茂林。
聯交所資料顯示，耀才出完盈喜之後連續3日，大股東葉茂林喺市場上瘋狂沽出8,197萬股或1.77億元股份，減持佔3日成交一半，相當於已發行股本4.83%！難怪沽壓大到咁。
如果有留意耀才近期買賣盤，就會發現呢3日其實耀才自己佔據大部份
沽盤，右手邊不停掛50K沽貨，然後買盤個棚儲到咁上下，就一口氣沽爆幾格。屈指一算，葉茂林平均減持價2.16元，低股份3日平均價2.18元些少。同樣有趣嘅係，沽完貨後，葉茂林提早向聯交所申報沽貨，唔係因為佢乖，而係睇嚟想個消息星期五唱通街，反映喺星期一股價度，至少佢成件事係要趕住做。而喺周一中午，葉茂林亦會喺公開活動見記者。
呢個操作表面上看似笨實，因為盈喜後股價2.48元，葉茂林沽貨平均價代表13%折讓，以3日市場接貨情況，照計配股可以更高價散貨。執筆呢一刻估計其中一個可能性，係耀才根據一般性授權配發新股畀葉茂林，形成先舊後新配股嘅效果，而耀才股東會早已通過發新股最多兩成嘅一般性授權。以目前股價2.12元計，葉茂林買新股價格有條件略低過或同自己沽貨價平手，葉茂林喺呢種操作下就有機會出現甜頭。如果真係發新股，集資啲錢可以做乜？以近期咁多熱門概念，的確不愁出路吧。
大家可能話，葉茂林趁市旺要錢唔要貨？首先，呢一刻係買家大曬嘅時段，北水要貨唔要錢。葉茂林等錢使？講緊喺一單大IPO，耀才有能力搵幾百億俾人抽孖展，嗰億幾錢斷估唔使喺自己隻股沽出嚟先有。
講返耀才之前盈喜，真係差到令股價大跌3日？佢4至9月稅前盈利4.01億，10至12月稅前盈利1.79億，即最新季度略低過4至9月嘅單季平均水平，但10至12月因螞蟻取消上市而向客戶陪孖展息同認購手續費，計埋呢單一次性因素，稅前盈利應該大約係4至9月嘅一半，唔算好但不至好差。
當然同富途大幅增長冇得比，但講緊耀才收入係富途三分之一，稅前盈利係富途四成，但市值只係富途4.6%而已。作為老細嘅葉茂林，相信只會覺得自己隻股underrate吧。
晉佳
-----------------------------
掌握理財智慧 感受生活品味
investMAN全新網頁 優雅登場
-----------------------------
部署退休 輕鬆達至財務自由
點擊即睇《退休理財天書》
-----------------------------
【全球樓行】 Dream House零距離
屬於香港人的移民攻略
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
智取大市 - 晉佳 舊文
來源 source: http://hk.news.appledaily.com
