冰說聰明 - 青冰 2021年1月20日
冰說聰明｜理想汽車概念股（青冰）
大市進入狂牛階段，股價對利好消息會極速反映，而反應亦都放大，盈喜固然升，發盈警但下半年蝕少咗，都好大機會升。現時做功課，只能睇得再深入啲，才找到市場未拎出嚟炒的因素，例如上周青冰提及的億和（838），幾日間就累升三成，不過周二創全年高位後倒跌，短線似乎要抖嚇喇。
上周說億和的炒作催化劑，係在業績內低調提及在北美洲市場有做Tesla生意，現時但凡有呢幾隻英文字，都會炒到飛天的，所以勤力刨多啲業績及年報，尋找蛛絲馬跡，在大牛市中必定有回報，而今次想講的股，亦係在業績內找到低調的亮點。
首程控股（697）前稱首長國際，係老牌紅籌，老一輩的投資者見到，都耍手擰頭話難炒，以前主業係做焦煤，但在幾年前決定轉型，發展停車場業務及私募基金，去年改名兼合股，表現算做有交代，由3月低位倍升，同時亦引入京東（9618）、厚樸及新創建（659）作股東，陣容鼎盛。戰友可能會話，喂隻股高位回吐近三成，咁弱好難搞喎，但只要你細讀中期業績，又會發現兩個英文字，今次不是Tesla喇，係LI，這個是美股代號，即係早前炒到飛天的理想汽車。
原來首程在理想汽車上市前參與過融資，是旗下的私募基金領投的，理想汽車在去年7月上市，上市價係11.5美元，周二晚的收市價係35.44美元，升兩倍，咁你話嗰啲上市前入股的基金股東，絕對唔止賺兩倍啦，而首程在業績都透露，在往後的基金退出期，會為公司帶來超額收益，青冰搵過料，首程的私募基金在三輪融資中，斥資約7億人仔，咁倍升呢條數就相當襟計喇。
理想汽車的半年禁售期，將於下周二屆滿，首程未必可即時沽貨嘅，但已經係不錯的炒作藉口啦。
青冰
-----------------------------
掌握理財智慧 感受生活品味
investMAN全新網頁 優雅登場
-----------------------------
部署退休 輕鬆達至財務自由
點擊即睇《退休理財天書》
-----------------------------
【全球樓行】 Dream House零距離
屬於香港人的移民攻略
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
冰說聰明 - 青冰 舊文
來源 source: http://hk.news.appledaily.com
