收市閒情｜海洋公園「免費入場」的盤算（千頌C）
海洋公園日前公佈大改革，山上山下全面拆骨。
海洋公園日前公佈大改革，山上山下全面拆骨，「山上園區」有得留低嘅機動遊戲，同埋新加嘅歷險嘢，搖桿車、空中滑索之類逐樣收費；「山下園區」就完全免費，到時引入零售、搞嚇市集、搞嚇Concert咁，
如果要幫園區改個新名，我會改做「海洋商場」。
睇咗Package Lau記招演出，憑一句「海洋公園唔再係主題樂園」，你就知道，今次佢嘅出現，唔再好似以前咁無人駕駛，而係有人幫佢度好份稿。好多人話「海洋公園唔再係主題樂園，聽執啦！」「免費入場搞零售，我去商場唔好？聽執啦！」其實又講真，如果佢仲係主題樂園，繼續一如既往咁去搞，都係聽執嘅。
咁家陣呢個做法有有得做呢？我又要講個故事，有好幾年咪好興環球嘉年華，啲人排曬隊咁入去。
咁曾經有個朋友個朋友個朋友，當時同個女仔發展中，咁發展階段，又想即興約嚇對方，環球嘉年華呢類就最好！入場費相對低門檻，入到去再逐個item收代幣；又唔使好似海洋公園、迪迪尼咁晨早入定去，成件事可以好即興，提出時都冇咁大壓力，可以輕輕一句，「不如收工去行個圈？」去到就去，去唔到就算，所以我相信環球嘉年華應該成功撮合過唔少情侶。
咁當時朋友個朋友個朋友就成功約左女仔去行個圈啦，相信大家都記得，當時環球嘉年華附近，好多人都會攬住隻大型公仔，滿載而歸咁離場，然後啲女仔行過一定會話：「嘩！呢隻啤好得意呀！」「呀！嗰隻貓好可愛呀」此起彼落嘅「好得意好可愛好得意好可愛……」就好易激發起男士嘅鬥心，就係離開時一定要擲到一隻大公仔離場！
於是，環球嘉年華就成為男人嘅戰場，擲公仔嘅戰場，一次唔得、兩次；兩次唔得、三次……你以為入去只係行個圈？戰場呀，戰場緊係要彈藥，單係10分鐘，擲幾次就擲可以擲走你幾百蚊！假設你叻仔你好快擲到，一場嚟到，有你入去到有機動遊戲，你唔係唔玩呀化？呢個又排嚇，唔個又玩嚇，結果單係一晚使費，連埋飲飲食食，好易就使咗千幾銀，埋單同去一日海洋公園，其實相差無幾。
今次Package Lau好明顯真係將海洋公園當商場Package咁搞，但商場有冇人去，重點係佢入面有咩鋪。我又假設，佢搵到個叻人幫佢將「海洋商場」搞得有聲有色，搞到啲好嘅活動，於是啲人又好順手上山「行個圈」，玩嚇機動遊戲，結果免費入場後，人均消費其實係有機會仲多過之前。
係架，免費真係可以係最貴，不過大前提係，你免費提供咩嘢畀我先？你吸引人入去嘅話，逼到人使錢嘅，咁咪話你勁囉，Package Lau到時仲可以好自豪咁講，「香港人一年去少幾次海洋公園，就買到樓。」
講返去環球嘉年華朋友個朋友個朋友，最後，佢錢就使咗，公仔都掟到，仲有回禮收㖭，就係「好人卡」一張。
by千頌C@堆填區
FB Page
MeWe Page
「與千頌C一起吃花生」MeWe Group
-----------------------------
掌握理財智慧 感受生活品味
investMAN全新網頁 優雅登場
-----------------------------
部署退休 輕鬆達至財務自由
點擊即睇《退休理財天書》
-----------------------------
【全球樓行】 Dream House零距離
屬於香港人的移民攻略
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
收市閒情 - 千頌C 舊文
來源 source: http://hk.news.appledaily.com
