樓市的碳水化合物
有食極唔肥老友叫我減肥，我話已經很節制，甚至比他吃得更少，老友話咁就要戒澱粉質，現在大多數人叫碳水化合物，內地人簡稱碳水。我說已經盡力，除早餐食一片飛邊多士，晚餐食半碗飯，已經冇碳水落肚，我亦試過戒碳水，體重的確下降，但出現便秘、口臭及皮膚粗糙等毛病，人亦變得非常憔
悴，冇氣冇力，連我孫女都話rice makes me stronger。由此可見，碳水化合物的好處多過壞處，食少一些可以，但戒唔食就似乎不必。
老友可能唔知道，樓市亦有碳水化合物，就是租金。如果沒有租金收入，代表那個物業不是完美，就算有升值潛力，業主亦會隨時將物業賣走。反之，如果每一個月都有租金收入，就算樓價下跌，業主都不會隨便將物業賣走。
換句話說，租金收入是持有一個物業不可或缺的條件，與人類需要碳水化合物一樣，人類缺少碳水化合物，就算體重下降，始終都是不健康，物業沒有租金收入，即使樓價年年上升，業主都不會開心。所以，大多數業主不會將物業空置而等待升值，最多是收少一些租金，減肥的人亦一樣，不應全部放棄碳水化合物，最多是減少一些，唔食咁多飯。
作者為紀惠集團行政總裁
文章轉載自「AM地產」facebook:
http://bit.ly/2wls4EF
湯文亮專欄 - 湯文亮 舊文
來源 source: http://www.am730.com.hk
