笑到最後｜跌市轉移視線分心大法（高明）
笑到最後｜跌市轉移視線分心大法（高明）
正如德國股神所講，跌市，最難忍受嘅地方係，證券商、傳媒、親戚朋友、姨媽姑姐、茶餐廳夥計等等都會係咁話股票冇前途，快啲沽、即刻沽。
又來到一年幾次嘅股市大調整，股市最神奇嘅地方係，每次升跌來來去去都係一樣，但
係每次跌（又或買錯另一邊），都會扣人心弦，繼而開app平倉，到跌幅過後，傳媒見股價上升，再搵無厘頭理由去支持升幅，先至發現當日下跌理由如此薄弱，被震走錯失升幅。
下載Yahoo財經APP
美股、外匯、加密貨幣免費即時報價，自選投資組合獲取相關新聞提示。
正如德國股神所講，跌市，最難忍受嘅地方係，證券商、傳媒、親戚朋友、姨媽姑姐、茶餐廳夥計等等都會係咁話股票冇前途，快啲沽、即刻沽。喺呢個氣氛下，所謂佛都會動心，結果每次都喺唔適當嘅時候沽貨，到今日資訊爆炸，一部手機又社交媒體又短訊，全天候都會話畀你聽你唔想聽嘅現實。
股價歷史證明，只要生意成熟到一個霸權階段，除非有新霸權取代，否則股價難免陷入長升局面。套用銀行術語，產品使用人口就算去到極限，佢cross sell 能力都極強，只需要大家望望手機嘅應用程式，有幾多係Google（GOOGL）系統；另外買咗iPhone嘅iFanboys，有冇成身都係蘋果（AAPL）產品？上述嘅霸權已經去到，就算推出一張蘋果A4紙，都肯定會賣斷市。
更加重要係，科技發展係有漫長嘅橫行期，情況有如人世間其他所有事情，例如事業發展，永遠唔會一帆風順，亦唔會成日逆境，最長時間係做同一職位唔上唔落。霸權股嘅好處，就係喺科技橫行期間，冇挑戰者，基本上獨霸武林。
不過，喺股價下跌嘅時間，上邊嘅都係廢話，無論你講到理論有幾勁，圖表出現任何訊號，持倉現兜兜跌緊，十五十六沽貨，配合社交媒體大合唱，好容易兩三下手勢沽曬啲貨出街。
唯一方法就係效法古代關雲長全神貫注捉棋刮骨療傷，投資者必須要發展一門興趣大量消耗時間及心神，入定過後一醒，已經收市，先至可以安全渡過調整期。就好似潛行空間發夢一樣，隨身一定要戴上一個物品，去判斷瞓緊覺定係醒返。
高明認為最有益身心嘅興趣，莫過於行山，因為行山多數手機收得差，如果貼近邊境更加會變成漫遊，漫遊數據十分甘，一般人都會關閉漫遊功能，而行山閒閒哋三個鐘以上，行完食埋飯瞓覺，醒返已經收咗市，跌幾多點同你完全冇關係。
股災搞到大家都驚
大家可能會問，炒個股票啫，點解要搞咁多嘢？因為股票世界同現實相反，當現實出現減價，大家係會爭住買。如果Donki出現「貨災」，貨品價格大跌30%，Donki會出現咩情況？相信排隊入Donki都成問題。同一件事發生喺股市，就係相反，股價升30%，先會出現人龍買股票。現實世界產品價格下跌，叫做激安；股價下跌，叫做股災。某程度上我哋活喺一個被潛意識控制嘅股市內活動，股價下跌，你驚，我驚，大家都會驚，除咗製造跌幅嘅人之外。
只要你將股災當成去激安之股市掃貨，贏面就會大好多。奈何要扭轉一個根深蒂固嘅潛意識好難，要自細唔係接受同一套教育模式，否則，買入，搵一門興趣，跌市轉移視線分心大法，係最好方法。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
