操盤手劄記│聖誕鐘買滙豐 舊調重彈？（割柑人）
操盤手劄記│聖誕鐘買滙豐 舊調重彈？（割柑人）
嚟緊星期六就係聖誕，以前就話「聖誕鐘、買滙豐」，但2007年匯豐控股 (0005.HK) 140年嚟首度發盈警，加上2009年供股觸發股價插落33元，令聞者傷心，青姐流淚後，此調已成絕響
。今年點睇？先睇外圍乜環境。上周，美國聯儲局議息後，一如預期拍板提前結束買債，明年3月搞掂，為隨後加息鋪路；英倫銀行則出乎意料宣布疫後首次加息；歐洲央行亦放慢買債步伐。
美股、外匯、加密貨幣免費即時報價，自選投資組合獲取相關新聞提示。
環球央行更趨鷹派，美股連跌兩日，道指、標指、納指上周五分別收跌1.48%、1.03%、0.07%。今年以嚟，各國疫情反覆，出現通脹辯論，美國尤甚。當中聯儲局主席鮑威爾10月尾對通脹「暫時性」嘅講法改口風，11月尾更坦言並非「暫時性」；財長耶倫亦由2月頭話「毋須擔心」，5月尾話「暫時性」，到12月頭話唔再講「暫時性」，可見通脹猛於虎之勢。
長期加息周期 市場將信將疑
不過，喺官員轉軚之時，市場又唱對台。美銀12月全球基金經理調查顯示，仍有55%受訪者認為通脹係暫時性，只有36%認為係持久性；預期通脹回落嘅淨比率亦達到33%，係10年嚟最多。事實上，雖然利率期貨顯示，市場預期聯儲局明年加息3次共0.75厘，但10年期債息喺議息後先升後跌，1年期債息則急升，孳息曲線趨平，反映市場預期明年加息後，未必能夠持續。
姑勿論官員睇得通定市場睇得透，傳統智慧有謂「Don't fight the Fed」，若果美國明年展開長期加息周期，加上英國已提早展開加息周期，有利國際銀行擴闊淨息差，提高盈利能力，尤其擁有資金成本優勢嘅大型銀行。大摩發表研究報告指出，滙豐、渣打（2888）較易受到銀行同業拆息嘅早期變動影響，明年同後年嘅每股盈利預測分別有約2%，以及7%至9%嘅潛在上升空間。
加息擴闊息差 最壞時刻已過
上年3月疫情高峰，美國、英國、歐洲為首嘅環球央行，緊急減息至近零利率，甚至負利率。滙豐淨利息收益率上年首季為1.54厘，次季跌至1.33厘，第三季更跌至1.2厘，至今仍喺呢個水平。英國係滙豐主要市場之一，英國加息有助滙豐增加息差收入。滙豐CFO早前預期，英國每加息0.25厘，首年可帶嚟5億美元額外收入；現時加息0.15厘，年度化收入增長亦有3億美元。
多國疫情反彈，供應鏈持續失衡，環球通脹升溫。英美息口趨升，滙豐息差收入無疑最壞時刻已過。滙豐股價上周五收46.4元，升2.8%，惟在美ADR折算收45.7元，較在港股價低1.5%。若喺呢個價位左右買入，按2月派全年成績表時更新嘅40%至55%派息政策推算，等到明年2月再派全年成績表時，至少收5厘股息（連中期息計）。滙豐短線上望10月高位48元，若能破位，明年初有望挑戰50元。不過，歐洲再成疫情重災區，暫時不宜重注，只宜分注收集。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
