士佳說 - 張士佳 2022年1月27日
【#士佳說 】張士佳：花開花落 雲卷雲舒
【#士佳說 】張士佳：花開花落 雲卷雲舒
俄羅斯和烏克蘭目前邊境很緊張，成為了週三全球下跌的導火線。港股也受到波及，期指大跌最多665點考驗24000。不過憂慮加息，通脹發惡，才是真正跌市原因，美股連續兩日大跌近千點然後deep V 回升收市，過山車十分之驚人。瞓醒以為無事，但港股並沒有因為美股高走而造好，兩日都係彈一彈再跌過，而連日壓低港股應該是受A股前日大跌或北水趕新春前沽貨套現所致，何以我得到這樣的推敲，大家可以看看日頭大戶出股之下，日中大市較外圍軟弱，而夜晚無股可出，所以就算儘管美股大落之時，夜期仍相較硬淨。
聯儲局議息後明確表示，最快3月初加息及結束減買債；Powell會后講不排除每次會議都加息的可能性，又話需要大規模縮表，使美股急速向下跌最多400點，再來急速起落市況。
指數表現咁飄忽，揀岩個股板塊則有助緩衝指數下跌風險。如果唔嫌波幅細，銀行股上升乃大勢所趨，先前提過嘅中銀香港#2388這輪升浪陽燭不斷，憧憬英倫銀行下周宣布加息，滙控#005前幾日跌少少又升番，市場資金似吼短線調一調即買返轉頭，想買平d都唔容易，恒生#011都似快要突破。而內銀股表現偏穩，建行#939、工行#1398及郵儲銀行#1658，都有資金追捧，不失為穩中求勝之選。
內房股亦一樣，仍然建議國企股為核心，中國海外#688及華潤置地#1109，因為個家開曬綠燈，容許國房不斷拼購救債，但如擔心國企要拍硬檔連豬頭骨都要哽埋，咁可以考慮國企物管，話晒版圖越來越大，做物館點都有着數，好似華潤置地及所屬物管華潤萬象生活#1209分別與招商銀行#3968達成30億併購融資合作，破近期頂可以關注，順帶一提綠城服務#9979，無懼大市變幻，寵辱不驚地又再破頂了（寵辱不驚，勁哩，其實我都唔算識，只係記得寵辱不驚，看庭前花開花落；去留無意，望天上雲卷雲舒，寵辱不驚幾咁平常心，唔係就係近日港股花開花落，生住異滅循環嘅寫照，生聚有時，唔駛驚）。
至於科技股就唔敢完全睇好，阿里巴巴#9988又跌近上兩次試底支持，呢隻上次話咗俾大家聽食了，食咗好過等，美國科技股氣氛極差，中概股唔似有力大幅反彈，拖住香港科技股。騰訊#700股價上上落落未行突破。美團#3690又跌反去上星期大陽燭起步位，主要買咗呢隻，買左唯有坐坐。
不過有個現象，幾隻社交平臺視頻公司有關的二，三線科技股有異動。赤子城科技#9911，以每股3.8港元向特定機構配股，所得資金將用於發展、擴充及經營公司的社交及遊戲業務，消息後陽燭收市，近期表現不錯。
恆騰網絡#136又公佈獲騰訊控股#700入股，記得上次配股價在2.5，如果上得反，可能會炒一炒。還有北水愛股快手#1024，連日來非弱，南向資金又加快流入，越來越歸邊，有大行估快手中國市場業務在2022第四季度實現盈虧平衡，睇好股價，不過圖表上都係再等多啲信號出來先再研究，始終蟹貨沉重。
工業金屬、油氣油服、航運物流等都有反彈。資源煤股等陸續出業績，表現一定不及預期，加上大行唱衰，所以兗礦能源#1171業績後多數會調整，但瞬間獲得支持。留意到鄭煤機#564通常係最尾去追落後，出了信號睇下可唔可以抄返上250天。電解鋁行業利潤回暖，中國宏橋#1378是國內電解鋁龍頭企業，股價硬淨之餘，更有波幅可以炒一炒，尋日升近6%。
未嗌打仗，我都預先同大家透露左，石油股，現在資源最強莫過於油汽油服，俄烏操戈，加速油價升浪，國際油價紐約期油倒及布蘭特期油升2%，升穿90美元，已是2014年10月以來首次升穿。中國海洋石油#883持續高企，中海油田服務#2883亦升4%；天倫燃氣#1600也在咬住高位。
大市這兩日雖跌成千點，個股亦有震盪，但筆者則傾向睇定d先，留前鬥後，等待市場所有行情消息出來之後，再留意發展方向。近日傳統板塊撐住大市，不過即使舊經濟股再強，中概股及ATMXJ都要盡快回復生氣，今日開始冇北水，或者又要等北水回來才能令大市重整旗鼓。
士佳說 - 張士佳 舊文
本文作轉載及備份之用 來源 source: http://skycheung.weebly.com
